聶廣男,八十後,香港某大學畢業,主修資訊科技,I.T.新晉,靜待「上位」機會。對社會有不滿,未能置業,但比上不足,比下又有餘。傾向建設多於破壞,亦相信積極建言比將一切推倒來得實際。
作者其他博評
金正恩與恒生指數
金正恩與恒生指數

要數近期最熱門嘅國際熱話,一定係北韓領導人金正恩同美國總統特朗普嘅「核爭議」,兩個人你一言、我一語,一個話我枱面有粒「核按鈕」,另一個就話我枱面果粒「核按鈕」仲大啲,大家都食晒花生睇下事情發展成點,有網民喺網上面貼晒圖話「你哋打啦!」。唔知係咪因為「國家事務」太繁忙,外媒報道金正恩近日出嚟講話嘅時候「老咗又肥咗」。廣男作為一個升斗市民,太複雜嘅國際關係就唔多識,最關心嘅係,一旦朝鮮半島打起上嚟,會唔會搞冧個市,等我哋呢啲小市民啲股票變晒「蟹貨」架?

金正恩特登變殘啲、變肥啲?

睇番外媒報道內容,其實都幾好笑。報道話喎,金正恩喺發表新年賀詞嘅時候,臉上面有衰老痕跡之餘,體重又上升咗唔少,話金正恩嘅健康狀況引人關注。不過,個報道同時又有引述分析,話金正恩可能係特登表現老態,等佢自己睇起嚟更加似一個「成熟的領導人」。對於呢啲揣測性咁強嘅分析,真係信不信由你,廣男關心嘅,都係個「金魚缸」多啲!

恒指都關金正恩事?

睇返香港,近十幾日個股市升到「呯呯聲」,今日收市仲再創十年新高,廣男唔知個市仲可以升幾耐,但有口痕友同廣男講,話如果金正恩同特朗普嘈嘈下,真係忍唔住噤咗粒「核按鈕」,繼而觸發更大衝突甚至戰爭,到時全球股市一定一齊冧檔,話廣男攞住啲股票分分鐘變「蟹貨」之餘,可以令現金都得唔值錢。廣男反問口痕友,「有冇你講得咁誇張呀,乜呢個年代仲興核武競技、核戰爭嘅咩?」口痕友於是就用一句「畀你咁易估到,果個就唔係金正恩啦」KO咗廣男喇!

畀口痕友咁樣講一講,廣男又真係好似「如夢初醒」,覺得金正恩真係分分鐘影響到我哋個股市,有啲啲啲啲膽心喎。不過,擔心都冇用,事關雖然近日個股市係咁升,但廣男同家人有啲股票都未升番、「去番家鄉」,而廣男家人基於「唔想蝕錢」所以點都唔肯放啲股票,所以廣男只可以「持續觀望」喇。

點都好啦,無論有冇影響股市都好,廣男都絕對唔希望有任何衝突,尤其係「核武」衝突發生,因為經歷過二次世界大戰,大家都明核武嘅可怕;佢嘅可怕之處唔只係摧毀人哋個國家,而係可以摧毀成個地球。而眾所周知,南北韓關係、美韓、中日關係喺亞太區好輕易就會觸動區內政經形勢,國家「一帶一路」嘅國策、同東盟國家嘅合作計劃能唔能夠開花結果或者一鑊熟,都有住不可分割嘅關係。所以廣男寄望唔同國家嘅領導人喺「出口術」之前,都係「停一停,諗一諗」好,萬一「擦槍走火」就唔好啦!

原圖:網上圖片

評論