如果我們不快樂?
如果我們不快樂?

香港作為高度發展地區、一個極富裕嘅國際都會,生活喺香港嘅市民應該唔會太「悲情」,不過最近一項調查發現,原來香港喺「全球最不快樂國家或地區」排第7,當中「淨快樂評分」喺100分滿分入面只得29分;有學者分析,香港嘅社會問題係長久累積而成,短期內都難以改善。點解香港經濟、治安等環境都唔係差,但係香港人仲係咁唔開心呢?


社會停止爭拗可以嗎?


根據學者嘅分析,香港雖然係富裕城市,但樓價屬於全球最高、年輕人缺乏向上流動嘅機會、基層生活艱難以及住屋問題等,都係短期內難以解開嘅「死結」。其實,無論對於調查結果抑或係學者嘅分析,廣男都充滿同感,尤其係樓價高、住屋困難嘅問題,廣男呢啲「食唔到上一浸水」而唔買到樓嘅80後青年,係咪未來幾年時間都要「望樓輕嘆」呢?


老實講,除咗樓價、上流等問題,唔多唔少都同社會氣氛同政治爭拗有關。對於政治問題,各持己見係好正常嘅事,而廣男就覺得,而家咁多社會問題都未解決,社會應該焦點放喺民生議題,定繼續為政治問題拗到你死我活呢?


現屆政府必須正視樓價高問題


不過咁,就算廣男嘅快樂程度未必如調查所指嘅29分咁低,但廣男又的確唔係咁快樂,樓價高事實上都係主因。廣男投身社會工作都有一段唔短嘅時間,但到呢一刻都冇屬於自己嘅安樂窩,結咗婚亦未有穩定嘅住所,對於一個大學畢業生嚟講,你話唔灰就假。冇錯,香港的確係一個富裕社會,但好多年輕人都咁努力讀書同工作,但始終冇一個屬於自己嘅「家」,感覺就好似營營役役,但「甚麼都沒有」咁,確實係會令人有啲Sad!


講真吖,好似上屆政府到今屆政府,都好強調解決住屋問題,但奇怪嘅係,近呢半年好似無人關心房屋問題咁,媒體日日夜夜都係報導唔同嘅政治事件或者法庭新聞。廣男就覺得,大家有政治意見要表達,冇問題,但如果花多啲精力喺解決民生、發展,會唔會好啲呢?政治呢家嘢,畀你拗得贏都未必會開心,但房屋等社會問題解決唔到,我哋呢啲青年人就一定唔會開心!


原圖:gov.hk

評論