呢期盲反派全力撲殺「一地兩檢」，有「長洲覆核王」之稱嘅郭卓堅早排提出司法覆核，指高鐵「一地兩檢」方案違反《基本法》，高等法院拒絕受理仲判郭卓堅要向政府支付訟費。當大家以為事件告一段落嘅時候，郭卓堅竟然「更進一步」，去廉署投訴特首林鄭月娥將全國人大授權香港嘅管理權，私下同廣東省簽訂《合作安排》屬於黑箱作業，仲聲稱懷疑林鄭月娥「割地」係為咗老公、兒子喺內地經商甚至林鄭月娥自己都有延後利益。吹到咁大，郭卓堅有冇事實根據先？佢咁樣指控人，又會唔會係誹謗呢？

既提請人大作決定 又何來黑箱作業？

諗真啲，其實郭卓堅嘅講法真係充滿矛盾，如果特區政府同廣東省簽訂「一地兩檢」嘅《合作安排》並且繞過人大常委會，咁郭卓堅話港府「私下」同廣東省簽訂安排，都或者講得通；但港府係同廣東省簽訂安排後提交人大常委會做最後決定架喎，試問「私下」又點會提交人大常委會呢？調番轉嚟講，如果提交得比人大常委會做最後決定，就肯定唔係「私下」、「黑箱作業」啦，唔該郭卓堅「零分重作」！

指特首及家人有利益 屬嚴重指控

更嚴重嘅問題，係郭卓堅去廉政公署投訴林鄭月娥嘅時候，聲稱懷疑林鄭咁做係為咗佢老公同埋兒子喺國內經商同辦事，能夠享受個人利益同方便，而林鄭自己亦會因此獲得延後利益。嗱，囍雨真係要講句，郭卓堅唔係加咗「懷疑」兩個字就講乜都得先，佢所提出嘅係非常嚴重嘅指控，佢而家講緊嘅係話特首懷疑「行為失當」甚至「貪污」，郭卓堅提出呢啲指控，佢到底有冇實質證據先？唔係純粹因為特首有家人喺內地工作，就話人係為家人謀取利益呀？好似兒戲咗少少喎！

其實呢，郭卓堅喺理據不足嘅情況下指控人已經唔係第一次架喇，搞到連法律援助署都話要停佢三年申請法援；囍雨估唔到嘅係，郭卓堅見自己司法覆核條「路」行唔通，竟然走去廉署投訴特首。法律援助署針對郭卓堅嘅濫告行為就作出相應措施啦，唔知廉署如果查證到郭卓堅嘅指控係子虛烏有嘅話，又有冇法例或者措施針對一啲去廉署借投訴攻擊政府官員、甚至不惜誣蔑他人嘅所謂舉報人呢？

原圖：Takungpao