聶廣男,八十後,香港某大學畢業,主修資訊科技,I.T.新晉,靜待「上位」機會。對社會有不滿,未能置業,但比上不足,比下又有餘。傾向建設多於破壞,亦相信積極建言比將一切推倒來得實際。
作者其他博評
教仔唔係咁教的 「良好意願」不等於什麼也可做!
教仔唔係咁教的 「良好意願」不等於什麼也可做!

《生果報》有篇訪問,剛獲准保釋嘅周永康同佢爸爸嘅專訪,周爸爸話「我認為他所做的,對年輕一代會有影響,我希望是正面的,比他年輕的,都有這想法,都有這追求 …」,言下之意,似乎都認為兒子所為對年輕一代有「正面」影響。廣男做咗爸爸唔係好耐,個仔仲細,但係睇完個專訪,都有好大嘅疑問,如果出發點好就可以犯法,咁第時阿仔大咗,我都好難教佢咩叫是非黑白呢!周永康爭取民主嘅決心,或者可以支持,影響到其他人關心社會;但係佢用違法手段爭取訴求,又點會對下一代有「正面」影響呢?

 

動機良好 卻有壞影響

 

對於「雙學三人」以至其他年青人爭取民主嘅決心,廣男一直都無乜懷疑嘅,之但係如果話用違法行為爭取都可以有「正面」影響,咁廣男就唔可以認同喇!大家可以想得到,如果有「良好動機」就可以用不法手段爭取,咁社會會變成點呢?今日一班後生仔因為爭取民主可以違法,唔通他日有人想幫助窮人,係咪又可以劫富濟貧?引用一句英文,就係「The end doesn’t justify the means」,即係就算目標有幾崇高,都唔代表所使用嘅手段(例如違法、傷害到他人)係啱嘅。

 

應向年輕人灌輸正確價值觀


廣男既係一位80後、亦為人父親,如果第日我嘅子女話要上街爭取各樣嘢例如民主、改善基層生活等,廣男唔一定反對,因為年青人有理想關心社會、懂得顧己及人係好事;但正正亦因為要顧己及人,所以行為既不應該影響、傷害到其他人,亦唔應該影響到社會秩序。用更義正詞嚴嘅說法,就係要同子女講清楚是非黑白,要表達意見絕對可以,但唔等於表達意見就可以衝擊甚至違法。可以想像到,如果今日唔向子女甚至年輕人講清楚是非、底線,第日佢哋闖咗禍,真係後悔莫及。

 

是非不分 怎可教出好兒女?


「雙學三人」嘅上訴案仍然有待終審法院作出裁決,但可以預見得到,就算「三人」唔駛再坐監,基本上都依然係戴罪之身。如果真係要問「雙學三人案」對社會以至年輕人有咩啟發同影響,就應該係年輕人表達訴求嘅時候,無論內心有幾激昂都好,都應該好好控制自己,唔好做出影響、傷害到他人嘅行為,否則累己及人,亦為令到父母及其他家人憂心!


原圖:RTHK