經常出訪外國「唱衰香港」嘅前政務司司長陳方安生，噚日透過發言人聲明自己獲頒2018 O'Connor Justice Prize嘅獎項，將會喺明年二月親自飛到美國領獎。呢個O'Connor Justice Prize獎項專門表揚一啲「在推動法治、公正、人權方面有非凡貢獻」嘅人。點解有關單位要將獎項頒畀陳方安生，囍雨當然唔敢肯定啦，但如果話陳方安生對法治等有非凡貢獻，囍雨只能講句「我尊重頒獎畀陳方安生嘅權利，但我誓死唔同意佢對法治有貢獻」！

支持「佔中」對法治有貢獻？

要數囍雨對陳方安生嘅印象，除咗佢近年不斷飛去英、美等國家，「巡迴唱衰」香港之外，囍雨好記得喺2014年違法「佔中」時，囍雨不但唔係好覺陳方安生有企出嚟批評違法行動，仲反過來譴責警方施放胡椒噴霧同催淚彈。囍雨真係好想問，如果有人違法衝擊、現場又有人踩人風險，警方根據現場情況作出適當決定都唔得？陳方安生對法治有「非凡貢獻」，包唔包括佢包庇違法行為，仲要調轉頭譴責依法執法嘅警方？

老實講，陳方安生近年不斷去外國「告洋狀」，批評中央、港府，甚至指本港言論自由、出版自由同學術自由等不斷削弱，囍雨直頭覺得佢用言論破壞緊香港法治就真！講言論自由，香港近年有人被政府「以言入罪」、身陷囹圄嗎？香港嘅法治狀況，其實一直無改變或者變差過，但陳方安生、李柱銘等人近年係咁唱衰法治，而家仲話要頒獎畀陳方安生，係咩玩法？

帶領禁議員提私人法案

今日囍雨睇新聞，見到某報章仲話陳方安生「為港發聲」，讚佢為官時堅守程序，囍雨真係當堂嚇咗一跳。曾經有段報導，指陳方安生當年上任布政司（政務司司長的前稱）後，極力抗拒政府嘅「行政主導」受到影響，甚至率領一眾官員到港督府，促請時任港督彭定康修改法例，規定未得到港督同意下，禁止立法局提交私人議員法案，以強化政府可以高度「行政主導」。陳方安生係咪真係咁為社會、人權，大家不如都諗一諗啦！

點都好，美國O'Connor Justice Prize頒畀陳方安生，呢啲別國內政我哋都唔能夠干預，不過話陳方安生喺法治等方面有咩貢獻，囍雨都係果句，我唔同意！

原圖：RTHK