溫和派「分手要狠」行番條溝通正路
溫和派「分手要狠」行番條溝通正路

「佔領中環」早前搞咗個「全民政改商討日」,投票前篩走建制同合乎《基本法》既方案不在話下,最後喺激進派既騎劫下,跑出三個都有公民提名既方案,所有溫和民主派提出既都落選,「佔中」公投正式畀激進派玩晒。事後個別民主派人士就話可能會退出有激進派參與既「真普選聯」,廣男覺得佢哋諗咁多係好嘥氣,個舞台都畀人霸咗,留低睇人表演又有咩意思呢?


廣男咁樣講,唔係可憐溫和民主派,因為佢哋畀人邊緣化其實係抵死既。第一,就算所謂商討日既投票係一個篩選既選舉遊戲,作為方案推銷者其實好應該為自己既方案宣傳、動員,學民思潮班學生哥一年半載前已經宣傳違法既公民提名啦,溫和民主派班大哥大姐投票輸咗先懵盛盛,出嚟話人哋耍茅招。雖然佢哋係老資格,但唔代表佢哋資深就Sure Win架,呢啲就係「長江後浪推前浪」!

第二,如果佢哋公道啲或者機警啲,一早指出篩走建制派果啲啱《基本法》既方案唔妥當,或者直斥投票方法只係反映部分支持「佔中」者既意見,唔係一個反映到現實既收集民意方式,佢哋就唔會畀人感覺輸打贏要啦。基於呢兩大原因,廣男唔會認為溫和民主派值得同情,只覺得佢哋係咎由自取,佢哋而家唯一既出路,就係收起龜縮、閃縮既態度,盡快同激進勢力分手,勇敢咁行佢哋既溝通、爭取路線。

可以預見,如果「佔領中環」付諸實行,到時騎劫咗運動既激進派一定搞亂中環,如果溫和民主派唔同佢哋分開,一定會被連累,到時佢哋既溫和支持者會離棄佢哋,激進支持者又唔會支持佢哋,到時咪「豬八戒照鏡」兩面不是人囉!再者,中央官員、特區政府、大律師公會同律師會都認同公民提名唔符合《基本法》,佢哋就算陪激進派癲,最後結果都只會係「拉倒」普選。溫和民主派要爭取普選,第一步亦都係最重要一步,就係同激進民主派分道揚鑣,而且要大大方方走出嚟反駛激進派既指控:「我哋係同中央同特區政府溝通呀,我哋要政制向前走,唔會陪你班激進派癲!」

原圖:網絡圖片

評論

你可能感興趣