呢個世界上，好多時係冇「無緣無故嘅愛」嘅，有啲人表面上為大眾謀福祉，其實就喺度盤算緊自己嘅利益；好似違法佔領行動發起人、港大法律學者戴耀廷咁，之前提出「民主500+」嘅概念，話要盡攬特首選委裡面港九同新界區議會嘅選委議席，繼而迫中央畀香港人「真普選」。近日，佢終於都露出狐狸尾巴，話自己都有可能落場參選，唔通佢搞場大龍鳳，就係為咗鋪路畀自己參選？

想做共主 又想做議員？

無論係之前嘅違法佔領行動、雷動計劃抑或特首「民間投票」，囍雨由戴耀廷策劃嘅一系列行動得出嘅觀感，就係戴耀廷想做非建制派「共主」，透過想主導社會大事，令非建制派議員、人士要歸邊聽佢指揮。不過，睇佢往績似乎就唔係好多人聽佢「指揮」喇，違法佔領變成民眾「拆大台」嘅亂局，雷動計劃變成累死自己友嘅操縱選舉遊戲，特首「民間投票」參與人數就同預期差天共地，戴耀廷可以話係搞一鑊，就衰一鑊！

今次佢提出「民主500+」嘅概念，成唔成功仲係未知之數，但佢自己話自己有機會參選，仲話自己已經分析過區議會、立法會選舉嘅票站得票，做晒功課咁，有冇咁好心呢？所謂「司馬昭之心，路人皆見」，原來戴耀廷鋪排咁多嘢，就係想出嚟參選！

囍雨覺得，以搞事政客嚟計，戴耀廷呢一次做法算係最聰明，大家試想下，戴耀廷等人因為策劃、煽動違法佔領而被告緊《公眾妨擾罪》，如果罪成唔單止面臨最高監禁七年嘅刑罰，佢自己喺港大嘅教席亦都隨時不保，佢為自己謀定條後路，成件事好「合理」啫！

欲參選從政 戴耀廷應該先「找數」

戴耀廷想參選，囍雨覺得完全唔係問題，無論政見點唔同都好，就算係參與過違法佔領嘅人，囍雨覺得戴耀廷等人都有權參選；但係，如果戴耀廷想參選、真真正正踏入政壇，囍雨覺得戴耀廷應該先找咗兩條數先！第一條數，梗係佢同其他違法佔領主事者要承擔罪責先啦，囍雨斷估當初成日話要「以法達義」嘅戴耀廷，最後唔會「走數」咁衰仔呀？至於第二條數，就係戴耀廷佢哋一早應承咗會公開，有關於違法佔領嘅帳目喇！如果戴耀廷真係要出嚟參選，就應該表現畀市民睇佢係有承擔，而唔係走數、違背承諾嘅三流政客，大家同唔同意呢？

原圖：takungpao