9個參與「違法佔領」嘅人被起訴《公眾妨擾罪》，根據戴耀廷幾年前嘅「劇本」，佢哋係好應該挺起胸膛承擔罪責嘅。不過觀乎戴耀廷近日嘅口風，佢哋對認唔認罪仲係支吾以對，「走數」味道愈嚟愈濃，戴耀廷近日接受媒體訪問，甚至掉返轉頭話政府「用壓制公民社會嘅控罪」告佢哋，明顯就係為自己即將「走數」搵落台階。囍雨真係覺得好疑惑，呢啲永遠得把口、講得出做唔到嘅所謂學者，仲有咩資格大剌剌公開講「違法達義」？仲有咩資格學人講「公民抗命」？

參與公民社會 與違法是兩回事

睇番戴耀廷接受媒體訪問時嘅一段說話，佢理直氣壯咁同媒體講「好明顯他們（政府）沒有放下，反而用壓制公民社會空間的控罪，這已不是我們一個人的事，要考慮的事多好多，要考慮對公民社會影響」。戴耀廷起初提出「違法達義」嘅違法佔領時，大大聲聲話若然被檢控，一定會「俯首認罪，承擔罪責」，再講到喺法庭唔會抗辯，以完善返法治添，咁點解今日突然又縮吓縮吓咁，抬出公民社會做擋箭牌？

囍雨唔係無的放矢咁鬧佢，從戴耀廷嘅答案，大家都清楚明白佢想點啦！去到上庭嘅時候，佢一定會話，本來自己唔想抗辯，但可惜吖，呢件已經唔係我自己嘅事，而係全個公民社會嘅事，我唔係為自己，而係為大家，所以不得不抗辯，一定要打甩罪名！嘩，呢個劇本真係老土到暈，粵語長片裡面都不時出現喎。

公民社會無故「被代表」、「被綑綁」？

再講，戴耀廷所講嘅公民社會，正正係由全社會所有公民組成，唔係戴耀廷說了算，更加唔可以因為佢一句說話，我哋身為公民社會嘅一份子就被代表、被綑綁！

香港法例保障市民係搞公民活動同政治行動，遊行、示威、絕食、抗議，全部冇問題，但前提係，咁唔代表參與公民社會嘅活動就可以犯法，甚至破壞社會安寧囉！戴耀廷一句「壓制公民社會」，就想將所有守法市民拉晒出去，自己就妄圖將違法責任撇清，有冇咁EASY先？好心佢唔好再混淆視聽啦！

戴耀廷身為法律學者，知法犯法唔特止，而家仲擺門唔想找數咁款，點講都講唔通啦，大佬呀，你當日話過，束手就擒，承擔罪責架，仲講過會考慮自縛雙手由警方拘捕添，而家呢？戴耀廷講得啱，呢單案已經唔係佢一個人嘅事，而係成個社會嘅事，因為如果79日「違法佔領」冇人需要找數的話，對成個社會都唔公平，社會亦唔會順氣！

幫DQ議員籌款 變咗幫戴耀廷打官司？

「細味」戴耀廷篇專訪，囍雨仲發現到一個幾有趣嘅地方，內文提到之前協助4個立法會議員宣誓案嘅「守護公義基金」，會改為協助戴耀廷等9人，長遠嚟講就會協助所有面對「政治檢控」嘅被告；呢句說話係出自戴耀廷口，定係「守護公義基金」相關人士，囍雨真係唔清楚，但係籌款目的本來係幫幾個DQ案議員，而家一個「回馬槍」變咗幫戴耀廷？本來話籌款幫人，而家就拎嚟為自己脫罪？如果真係咁做嘅話，咁點向本身捐錢畀DQ案議員嘅捐款者交代呢？呢個查實係咪「老千局」嚟架？

幾時公開「佔領」數簿？

仲有仲有，「佔領三人組」除咗要找香港法治條「數」，佢哋到而家都好似未公開「違法佔領」嘅完整帳目，咁多條數都未找，仲成日想歪曲是非，將執行法律嘅政府「妖魔化」，唔該戴耀廷唔好再「搬龍門」啦，快啲將「違法佔領」嘅數簿交出嚟啦！

原圖：Takungpao