美國聯合航空（下稱聯航）用暴力強行喺客機上拖走華裔乘客，事後仲振振有詞話係乘客製造混亂，事件唔單止喺美國激起公憤，連遠在香港嘅媒體、市民都感到義憤填膺！有人話今次事件起源於航空公司「超賣」機票，亦有說法指今次事件起源於要騰出機位畀航空公司職員上機。囍雨覺得，今次聯航嘅敗筆，主要唔係因為「超賣」機位或者要乘客落機，而係佢哋嘅處理手法極其差劣，最終釀成難以挽救嘅公關災難！

金錢或能解決問題

老老實實，如果大家上到飛機，先畀機組人員趕你落機，會有咩感受？第一反應梗係大力反對喇，囍雨就唔明，如果聯航早啲知道要騰出機位畀公司職員上機，點解唔喺乘客登機、登記嘅時候，就解決機位唔夠嘅問題呢？相信任何人坐咗喺飛機先畀人趕落機，都唔會欣然接受有關安排。就算真係要乘客上到飛機先請乘客落機，係咪又可以出多少少錢（報導寫聯航最高出價800美元，有人要求1600美元），等唔趕時間嘅乘客自願落機，騰出有關機位呢？囍雨唔係鼓勵所有問題都用錢解決，但如果用錢可以避免暴力事件發生，何樂而不為呢？

今次事件最令人反感嘅地方，就係警員用暴力趕乘客落機，一個年近70歲嘅老人家、老醫生，畀人搞到血流披面，睇到人心都痛埋！坦白講，囍雨絕對唔覺得「超賣」或者「機位唔夠」係趕人落機嘅正當理由，暴力更加係唔可以接受！個老乘客真金白銀畀錢買機票，佢本來就應該坐原機到達佢要去嘅目的地，聯航要人落機，唔該用正當方法說服佢，或者用高價等其他乘客讓出機位，用暴力趕一個無搞事、畀咗錢買機票嘅乘客落機，如果冇引起公憤先至奇怪！何況邊個都唔肯定同樣嘅事件，會唔會有日發生喺自己身上！

華人被歧視之嫌

今次受害乘客直言，自己係因為華人身份而遭到針對，囍雨判斷唔到係真定假，但係喺無人自願落機嘅情況下，機組人員宣布隨機抽點4人，點解會咁啱抽中今次華裔受害者同佢嘅太太呢？要同時抽中二人，機會可能係千份之一甚至萬分之一，受害者以至外界認為今次涉及種族歧視，都有一定道理。囍雨就喺度諗，如果機組人員真係隨機抽點，而抽中嘅唔係華裔人士而係美國白人，會唔會一樣受到暴力對待呢？囍雨相信未必，因為美國人對待白人、華裔人士以至黑人，從來都係唔一樣！

聯航暴力事件引起全球公憤，有人到美國官方網站發起聯署，聯署一日就超過10萬人嘅門檻，即白宮需要正式回應事件，雖然白宮發言人講到明要聯邦調查局查呢件事嘅機會唔大，但有關運輸部門已經表示會調查事件。無論有關部門調查結果如何，囍雨覺得聯航首先要真心向受害乘客道歉、賠償，如果當事人都唔願意原諒聯航，外界又點會放過一間暴力對待老人家嘅航空公司呢？

原圖：網上圖片