擁有北京大學博士學位嘅立法會議員鄭松泰，上年10月喺立法會會議廳內無啦啦走去「倒插」國旗同區旗，結果被警方正式落案起訴《侮辱國旗罪》同《侮辱區旗罪》。警方文明咁邀請一名涉嫌觸犯刑事罪行嘅疑犯，去警署收信，對鄭博士嚟講其實已經算係禮遇有嘉，不過鄭博士竟然自恃立法會議員身份，聲稱公務繁忙，公開叫警方將封信寄去立法會畀立法會主席或者秘書處喎，嘩，聽到鄭博士咁講，囍雨真係忍唔住要學《九品芝麻官》裡面嘅對白：「好大嘅官威呀」！

鄭松泰邏輯混亂

作為立法會議員，叫人寄信去立法會畀佢無可厚非，但鄭博士係畀人告侮辱國旗、區旗喎，係刑事罪行嚟喎，點解要警方畀信立法會主席或者秘書處呢？有關信件唔交畀「被告」，咁應該交去邊？或者咁諗，鄭博士可能因為覺得自己喺立法會嘅言論免責，所以唔應該被告，不過言論免責同涉嫌干犯刑事罪行又係兩回事，佢「師傅」黃毓民喺立法會「掟杯」都一樣要上法庭受審兼被判罪成啦，好心鄭博士唔好以為自己係立法會議員就大晒先得架！

講真，如果鄭博士覺得自己真係無罪，大可以喺法庭上抗辯吖，向法官證明自己清白嘛。佢而家唔肯收信之餘，仲要話今次畀人告同「議員宣誓案」、「旺角暴動」等等都係「政治大清算」，咁就大有問題喇！鄭博士講呢番說話時好似係一氣呵成、理直氣壯咁，可惜根本就歪理連篇，而且完全唔經大腦，等囍雨幫鄭博士上返堂通識堂啦！

嗱，議員宣誓案呢，涉及嘅係違反《基本法》同《宣誓及聲明條例》，就算立法會議員都唔可以違反法例架，如果唔係法例畀權選民，選民又點選你班立法會議員出嚟呀？而家有人違法喎，唔通政府唔應該執法？你話係唔係呀，鄭博士！

至於鄭博士有關「旺角暴動」就仲低能，鄭博士為人師表，唔通終極目標就係想維護掟磚、放火嘅暴徒？但香港法院唔係咁睇喎，認為對暴徒嘅處分要有阻嚇力喎，鄭博士又點睇呢？ 咦，佢唔係想鬧法官呀？唔好呀，你會破壞司法獨立架！

鄭松泰曾讚揚掟磚行為

是咁的，鄭松泰博士嚟架嘛，而家剩係識喺網上話政府荒謬，自己做完衰嘢又唔敢認，計囍雨話，佢係想為違法行為開脫至真，鄭博士，你答我一句，你有冇倒插國旗區旗？只要答有定冇就可以！

不過算啦，鄭博士其實已經唔係一次亂講廿四，好似「旺角暴動」之後，佢就曾經讚揚「掟磚係香港民主一大進步」；一個身為大學導師嘅博士，自己畀人告嘅時候連信都唔收，又想將其他「港獨」派嘅行為包裝成被「政治清算」，連黑白是非都唔分清楚，鄭松泰配做大學導師、立法會議員咩？節省少少啦，鄭博士！

原圖：無綫新聞截圖