乜嘢叫做「不務正業」呢？睇睇立法會非建制派議員就一清二楚喇。又再流會嘅立法會，原本會討論由公民黨郭家麒提出嘅〈促請下任行政長官重啟政改〉議案；嘩！「重啟政改」喎，咁大件事，非建制派應該總動員出席啦，不過Sorry呀，實情係由於非建制派大量缺席會議，結果搞到流會，而非建制派缺席嘅理由更加係「千奇百趣」，有啲就去咗聲援「違法佔領」嘅疑犯、有啲就走咗去電台做節目。開會呢？行埋一邊啦，非建制派唔覺得重要囉！

非建制派不務正業缺席會議

要數非建制派嘅缺席理由，哈哈，除咗「好笑」之外都唔知仲可以講乜。身為「違法佔領」疑犯嘅陳淑莊今早要上庭，佢缺席會議都算講得過去啦，咁其他人呢？提出今次會議議案嘅郭家麒，聲稱因為塞車遲到。好奇怪，乜佢第一日做議員咩？第一日先朝早金鐘一帶會塞車架？自己提出議案都唔早啲到？不知所謂！

囍雨再數一數，公民黨另一議員譚文豪、香港眾志嘅羅冠聰、九龍西嘅議員劉小麗，呢三個就選擇去聲援班疑犯都唔去開會、至於教育界葉建源就因為出席電台節目，所以話趕唔切去立法會開會喎。

睇到呢度，其實大家會唔會有疑問，市民每個月畀成十皮嘢呢班議員（每個呀！），大家係想佢去法庭「聲援」班「違法佔領」疑犯，定係想佢哋開會議事多啲呢？非建制派支持者或者唔少都覺得，民生唔緊要，政治大晒，但大家唔好忘記，今次議案係〈促請下任行政長官重啟政改〉喎，重啟政改喎，非建制派同佢班死忠FANS唔係覺得好重要、好大件事架咩？

流會責任非建制派最大

包返個底先，今次流會，的確係建制派都有責任嘅。不過講到責任邊個大啲，老實講，肯定就係非建制派啦。喂，個議案又係你班人提出嘅、個題目內容又係你班人成日掛喺口邊嘅「重啟政改」，你班人仲話新一屆政府唔重啟政改就唔會同佢「大和解」，咁而家你班人搞到流會，到底想點先？

同非建制派唔同，建制派一向都唔認為「重啟政改」係首要工作，反而房屋、扶貧，同埋經濟發展等等議題，先係佢哋主打，況且，今日留喺會議廳嘅28個議員，絕大部份都係建制派，非建制派計落一隻手數得晒，邊個過份啲，真係唔使再拗。

非建制派從不介意撕裂

非建制派咁唔積極參加「重啟政改」討論，家陣仲要搞到流會，實在令人好懷疑，所謂「重啟政改」喺佢哋眼中，係咪真係好重要。當日佢哋不斷攻擊林鄭月娥唔肯承諾重啟政改係撕裂社會，但觀乎佢哋咁唔積極嘅態度，實在好有理由令人相信，「重啟政改」對佢哋嚟講只係「口號」，係宣傳方式啫。至於所謂「社會撕裂」，算把啦，都係口號嚟啫，佢哋根本就唔志在去修補社會關係，從佢哋不斷拒絕林鄭月娥嘅橄欖枝，大家都已經知道，只有撕裂，非建制派先有生存空間囉！

圖片來源：香港電台即時新聞