香港冇人可以凌駕法律，政府官員唔可以、立法會議員唔可以，就算打住所謂「民主」旗號嘅人都唔可以！事隔兩年幾，警方終於預約拘捕79日「違法佔領」嘅幾個始作俑者，同埋部份有份參與領導工作嘅疑犯；九個疑犯，收到警方通知後反應大同小異，不約而同聲稱是「進一步撕裂社會」、係候任行政長官林鄭月娥要施「下馬威」等等。其實講咗兩年，相信香港市民都會問一個最核心嘅問題：當日佢哋明確話自己係違法，仲會承擔罪責，而家政府依法檢控，就會變成撕裂社會？乜撕裂社會唔係『違法佔領』咩？

「違法佔領」必須真找數

今次被警方「預約拘捕」嘅，包括「佔領三人組」，即係戴耀廷、陳健民同朱耀明，另外仲包括前立法會議員李永達、前學聯成員張秀賢、鍾耀華、社民連副主席黃浩銘，同埋兩位現任立法會議員邵家臻同陳淑莊，罪名係《公眾妨擾罪》。

預約拘捕消息傳出後，呢班人紛紛發表謬論，其中社福界立法會議員邵家臻批評，政府無論如何都想起訴佢哋，仲話政府早排司法覆核四位議員嘅資格，而家就起訴曾參與「佔中」嘅議員，問候任特首林鄭月娥點樣改善同議員嘅關係喎！另一被捕嘅違法佔領行動發起人陳健民，竟然將事件同林鄭月娥當選特首扯上關係，話警方喺特首選舉完結後拘捕他們，質疑林鄭月娥當選要化解社會撕裂嘅說法，認為政府係「擴大撕裂」。

修補關係重要 維護法治更重要

嘩！呢啲觀點真係荒謬到得人驚，根據邵家臻、陳健民嘅講法，即係政府如果想修補同非建制派立法會議員嘅關係，咁就連非建制派犯法都唔拉得、唔告得，咁非建制派議員咪好惡？雖然佢喺鏡頭前話，一定會承擔罪責，又話自己所做唔係為私利，但佢同時又講到，好似自己犯法都唔可以告喎，即係暗示立法會議員凌駕法律啦，好得人驚、好前後矛盾呀！

邵家臻、陳健民有冇犯法，囍雨唔敢講，留畀法官判就最公平。囍雨唯一知嘅係，邵家臻當日佔領期間，長期擔任大台「咪手」，呼籲一眾參加者參加大量疑似違法行動，邵社工千萬唔好抵賴喎，好醜怪架。

仲有仲有，大家唔好唔記得喎，邵家臻係所謂嘅「佔中十死士」之一，早於2013年已經公開表明，「佔領」後會主動自首並且唔會喺法庭抗辯，你自己都一早講咗會去違法、仲講明唔抗辯添，咁而家政府告你，因咩事變成「破壞關係」先？一時又話承擔罪責、預咗要還，而家又暗示你係立法會議員所以唔應該告你，咁咪係「人治」而唔係「法治」囉！？

至於陳健民嘅講法，一樣係非常之無稽，林鄭月娥噚日先當選成為特首，而檢控工作一直係律政司負責，事件明顯係律政司依照調查、搜集證據進度而作出決定，將責任歸咎於啱啱當選、仲未上任嘅林鄭月娥身上根本係於理不通，囍雨真係想問陳健民，你有冇常識架？！

依法檢控不是秋後算帳

至於另一個被預約拘捕的前學聯成員張秀賢就仲好笑，佢話喎，今次事件係「秋後算帳」，又形容係林鄭月娥嘅「下馬威」。對於張秀賢嘅說法，識笑真係好好笑，兩個冬天都過咗，點為之「秋後算帳」呀？如果真係做過違法嘅事，咁就梗係事後先同你計數，咁到底你有冇違法先？如果有，唔該唔好再混淆視聽，所謂「出得嚟行，預咗要還」，喺度「撒賴」做乜？

仲有，推檢控決定推落林鄭月娥身上，呢種說法真係無知。首先，律政司司長袁國強早前承認，律政司已經將完成「佔中」嘅研究，並將完整法律意見交到警方手上，根本唔係一朝一夕嘅事，試問同「下馬威」有咩關係？第二，大佬呀，醒少少啦，呢單嘢幾時到林鄭月娥決定呀？佢仲未上任，唔好屈得就屈、卸得就卸啦，拜託！

香港不能無故被佔79日

記得當日，「違法佔領」幾名發起人，用「俯首認罪，承擔罪責」為名，呃咗唔少市民參加「違法佔領」，其中戴耀廷仲散播埋嗰啲所謂「違法達義」嘅危險概念，結果將香港搞到烏煙瘴氣。當日「佔領三人組」係就係有去「自首」，不過只係有條件認罪，承認「非法集結」咋，對於其他「違法佔領」衍生嘅罪行，佢哋唔認數架。

香港主要幹道，唔應該無啦啦畀人佔領足足79日，呢筆數，點都要找，希望呢班的確參加過「違法佔領」嘅人，唔好再推卸責任，真正實踐當然承諾：「俯首認罪，承擔罪責」，咁你哋仲可以贏得一絲絲尊重。

圖片來源：香港電台即時新聞