走數、走數，又走數！講緊嘅係邊個，咪就係拖足兩年零三個月，仍然拒絕交代「違法佔領」盤帳目嘅「佔領三人組」囉。老實講，過咗咁耐，大部份市民都已經唔記得咗呢件事，如果唔係另一個激進組織「學民思潮」早幾日喺網上交代自己盤數，囍雨都差啲唔記得，係喎，「違法佔領」仲未找數、仲未公開數簿架喎！

藉口多多　從未交代帳目

嗱，唔好話囍雨吹毛求疵，「佔領三人組」一早答應過會交代「違法佔領」嘅數簿，唔通真係博大霧大家唔記得，打算側側膊就算？尤其係今日仍然活躍政壇，經常念茲在茲做民主派共主嘅戴耀廷，超過兩年喇，每次記者問佢幾時交數簿，佢就一直採取「拖字訣」，早兩年仲無啦啦將「交數簿」同港大遴選副校長拉埋嚟講，咁好啦，港大選完副校長都成年啦，咁點解仲唔交代條數呢？

每次記者問親戴耀廷，呢位港大法律學者總有無限個理由去拖延，每次都話已經將條數交咗畀會計師，佢自己亦唔知點解會計師會搞咁耐喎。戴副教授，兩年喇喎，盤數好複雜架咩？個會計師搞咁耐都搞唔掂？

「違法佔領」遺害大　交代帳目是必須

講到呢度，大家或許仍然唔知件事嘅嚴重性。「違法佔領」歷時79日，呢79日，令到香港社會大撕裂，朋友反目、親戚朋友關係破裂，社會爭拗無日無之，甚至之後喺香港爆發嘅多項嚴重暴力事件，其實都同「違法佔中」唔多唔少有關係，好似「鳩嗚團」、「暴力光復」、甚至「旺角暴動」咁，全部都係因為「佔領三人組」帶出「自己喜歡就犯法」嘅危險概念出嚟，搞到香港七國咁亂，直到今日旺角仍有示威者霸住條路，只係傳媒冇再報道啫，唔通真係連交數簿咁普通嘅要求都做唔到？

搞局始作俑者　財政零透明度

查實自從「違法佔領」之後，戴耀廷呢兩年都冇靜過落嚟，記得立法會選舉時嘅「雷動計劃」嘛？仲有近日特首選舉時所謂的「特首民投」呢？全部嘢都係戴耀廷搞出嚟架，呢啲活動用錢多唔在講，花嘅時間亦肯定唔少，戴耀廷花咁多時間做其他嘢，在情在理係唔係都應該交代咗「違法佔領」條數先呢？咁都唔做，試問仲有乜「誠信」可言先？

點都好啦，「違法佔領」未交數簿呢單嘢呢，整個社會其實都值得追落去，千萬唔好畀時間沖淡大家記憶呀。「佔領三人組」，至少都要好似學民思潮咁，簡簡單單喺網上交代用咗幾多錢吖；雖然，學民思潮大部份嘅錢都用咗落「打官司」度，值唔值得就大家討論啦，但至少佢哋畀市民有個「知」字，點都好過戴耀廷佢哋幾個囉！

原圖：takungpao