日前三個候選人第一次同台喺電視辯論，大家雖然無份投票，但都帶定花生睇佢哋表演，薯片叔叔曾俊華網上萬千呃Like成功吸咗唔少fans，林鄭綽號「好打得」又熟書，胡官冇包袱、有章法就算插科打渾相信都有啲娛樂性，大家都滿懷期望，但結果呢？一個唔熟書、一個好似唔夠瞓、而好似「好打得」嘅又好禮讓，睇到跌咗一地眼鏡碎。

「四捨五入、出神入化」做錯數？

囍雨一直以為做咗九年財爺嘅薯片叔叔應該好熟經濟，點知佢連「負入息稅」都講到唔清唔楚，仲有當林鄭月娥講到有關曾俊華推出「0-1-1」方案令到政府部門怨聲載道嘅時候，曾俊華聲稱政府支出冇減少，話自己2007年做財政司果時政府開支係2,000億，增加到而家嘅5,000億，增幅有1.5倍；點知林鄭月娥旋即踢爆佢有關數字應該係2,300幾億同4,600億，根本就冇1.5倍，增幅只係大約一倍左右！

林鄭一句「四捨五入、出神入化」KO咗薯片，究竟佢係連自己果瓣都唔熟書？抑或係暴露咗佢年年估錯數嘅弱點，真係佢自己先知！但係如果係後者，唔怪得成日「噤」實政府個袋唔肯加大福利同教育長遠開支嘅承擔啦！

丁屋唔關財爺事？

薯片另一進擊位係話林鄭月娥過去幾年工作，好多時都係「有頭威無結果」，例如林鄭月娥多次提到要取締丁屋問題，但到而家連提都冇提，囍雨聽到都有啲驚訝，好似林鄭所講，林鄭係做緊發展局局長時提出處理丁屋問題，而今屆政府接手處理丁屋問題嘅係發展局，明明係財政司司掌管嘅，咁薯片自己咪要問責囉？！講到地嘅嘢，薯片係土地供應督導委員會主席，今時今日樓市咁癲皆因供應唔夠，咁過去九年薯片搵地搵咗去邊呢？聽聞佢都冇乜開會，仲好意思攞嚟揼人？

諗咁多嘢喺Facebook呃Like，不如實實際際，開番多啲會解決土地同房屋供應嘅問題啦！唔怪得唔少人批評薯片做緊果個位Hea做，搞到出晒問題，而家先話爭做特首嚟幫市民解決問題，唔係呀化！

依囍雨所見，林鄭雖然熟書，但係太過「留手」，進擊力稍遜，所以囍雨睇到最後十幾分鐘都差唔多瞓著咗！