特首梁振英上任前，同企業UGL簽訂「不競爭、不挖角」離職協議。曾經身為跨國公司高層嘅佢，簽訂過程中委託律師跟進，刻意加入條款確保不涉利益衝突。偏偏身為非建制派喉舌嘅《蘋果》死咬唔放，係都要話梁振英「涉貪」，梁振英舊年終於忍唔住出律師信畀《蘋果》，要求佢哋唔好再斷章取義，要全面報道事件，包括外國監察機構早已講明唔會調查梁振英。偏偏《蘋果》避得就避，一直唔覆，前幾日再「博大霧」出多幾篇涉嫌誹謗梁振英涉貪嘅報道，結果咪再收律師信囉。雖然佢拎埋「新聞自由」去做「擋箭牌」，但係失實證據成紙都係，想拆未必咁易喎，況且正所謂「多行不義必自......」
 
連事實都搞錯 《蘋果》等如生安白造
 
《蘋果》報道眾多失實內容中，最離譜嘅係連基本事實都搞錯！喺2017年2月21日一篇題為〈政協副主席不獲豁免起訴〉嘅報道中，《蘋果》錯誤指梁振英出任戴德梁行（DTZ）董事時，與澳洲企業UGL簽訂「秘密協議」。
 
短短一段字，事實錯誤已經有兩處，包括：一）梁振英喺2011年12月初同UGL簽訂「離職協議」時，其實並唔係DTZ嘅董事；二）DTZ管理層完全清楚UGL和梁振英先生簽訂離職協議，包括當時DTZ主席嘅Tim Melville-Ross都知悉呢件事，所以根本唔係《蘋果》所講嘅「秘密協議」！
 
囍雨私下問過啲反貪專家，由於梁振英當時冇公職在身，加上係自行請辭，呢種離職協議只要當時佢老闆或收購各方主事人知道，協議上嘅「分手費」就算合法，唔可以當作「代理人貪污交易」去睇。呢一點，正係呢單貪污指控成唔成立嘅關鍵，《蘋果》刻意「漏咗」，等如「砌梁振英生豬肉」，做傳媒做到咁，難怪成日畀人告誹謗啦！
 
《蘋果》拒絕回應因為心虛？
 
其實，據梁振英日前發畀《蘋果》嘅最新律師信顯示，《蘋果》一方原來一直冇回應梁振英舊年九月提出嘅質疑。梁振英舊年透過律師指出，《蘋果》喺2014年10月11日報道，話英國反貪機構勢介入調查「UGL事件」，但原來英國嘅反貪機構，一早講咗唔會調查。
 
為免有人扮唔明，當時梁振英仲特登喺律師信講明，英國嚴重詐騙調查局（Serious Fraud Office of the United Kingdom）負責人早於2014年11月已決定不會就「UGL事件」調查梁振英；就連英國金融行為監管局（Financial Conduct Authority of the United Kingdom）亦喺2014年10月已宣布，金融行為監管局無權作任何行動。
 
換而言之，《蘋果》係「講啲唔講啲」，講到梁振英好似仲有嫌疑在身咁，梁振英一方就認為，《蘋果》早就知道呢啲機會嘅決定，但就拒絕全面報道，即係話市民如果只睇《蘋果》，就唔會知英國反貪機構嘅決定囉。
 
律師信仲講明，如果《蘋果》唔同意上述陳述嘅話，請提供理由添！可惜吖，原來自從舊年九月後，《蘋果》一方就一直冇回覆過梁振英嘅質疑，呢種左閃右避嘅態度，實在十分疑人懷疑，唔通有人自知衰咗，所以選擇逃避？
 
講到底，一間傳媒，就一件事作報道，最後竟然搞到「斷章取義」、拒絕全面報道，以及最嚴重嘅「連基本事實都搞錯」！《蘋果》劣跡斑斑，以往多次牽涉誹謗官司，被判敗訴嘅次數亦唔算少，點知呢份報紙仲係吸取唔到教訓，收到律師信後亦唔檢討自己報道內容，係都要繼續涉嫌誹謗梁振英，一份報紙去到咁嘅田地，寧願「報格」蕩然無存都繼續要「生安白造」老屈梁振英，背後到底有咩理由，心清眼亮嘅讀者一定明嘅！