近年，某啲人經常鬧政府「干預」大學自主，但從來都係口講口賠，從來冇拎過證據出嚟。以港大為例，政府當日公布委任李國章教授做校委會主席，班學生同非建制派同樣係咁鬧，話一定又會政治干預，點知成班都錯晒啦，李國章唔止非常有紋路，而且勁開明囉！好似佢任內就成立咗個檢討港大管治架構嘅專責小組，小組近日完成報告，建議取消「特首校監必然制」，以及將「校監」改為榮譽性質等等。嗱，小組有咩建議，囍雨唔敢批評太多，只係想問一句：「大學每年用咁多公帑，如果冇政府官員監督，咁大學咪好易變『獨立王國』？」

幾十億撥款邊個監管？

首先，大家知唔知香港各間公立大學，每年主體經費由幾多來自政府？答案係80%，大學每年主體經費有80%係來自政府撥款，用嘅即係公帑。其他大學唔講喇，剩係講港大，每年用公帑支付嘅經常撥款都成40億，係每年40億喎，大家唔會覺得，啲錢撥咗入去大學就唔使理啩？

今次港大份報告建議取消「特首校監必然制」，又話現時已經有教資會同教育局等部門可以監督大學運作，所以唔應該繼續由特首做必然校監咁話。囍雨認為，呢個說法肯定有唔完善之處，特首係唔係一定要做大學校監，社會可以討論，但專責小組亦要回答，如果大學管治架構裡面冇政府代表，咁邊個負責去確保資源合理運用先？

仲有，雖則話教資會亦會監督大學，但大家有所不知，教資會現時其實係冇代表喺大學管治架構裡面架，大學雖然要向教資會交代啫，但若然有事喺上嚟，事後先交代就太遲啦，要「防患於未然」嘛！

大家都係「法定機構」 大學監管寬鬆啲？

查實，香港各間公立大學，包括港大，全部都係根據香港法例成立嘅「法定機構」，當然，大學性質同其他「法定機構」，例如醫院管理局、機場管理局、貿易發展局，甚至旅遊發展局等等，雖然唔可以完全類比，但大家唔好忘記，佢哋其實亦有共通點，就係全部都「牽涉公帑運用」，以及有「法定職能」。

除咗大學以外，香港各個「法定機構」裡面嘅最高管治架構，例如董事局，都基本上一定有「官守成員」，亦即係現任政府官員喺裡面，目的當然就係確保「法定機構」依照法例要求履行「法定職能」，同埋監察公帑合理運用，呢個亦係政府責任。

草率決定 大學變成「無王管」？

如果根本份專責小組報告咁講，取消「特首校監必然制」，又要將「校監」改為榮譽性質，但又唔會喺大學管治架構裡面加入官守成員，咁大學咪好易成為「獨立王國」或者「私人俱樂部」(Private Club)囉？剩係港大都每年40億喎，計埋其他大學，每年要成170億以上架，咁大筆錢，相信市民唔會認同唔使監察囉。

計囍雨話呢，大家處事首先唔好泛政治化先，要求大學有監管，同「干預學術自由」完全係兩回事，唔好混為一談，亦唔以用呢個藉口做保護傘喎！唔想特首做校監？唔想大學管治架構裡面有官員？冇所謂，但至少都要有教資會成員坐喺裡面，政府每年撥170億以上畀大學，幾間大學加埋真係富可敵國，政府作為撥錢出去嗰個，唔係冇份監督呀？囍雨認為社會要認真討論，唔可以草率決定囉。

原圖: 大公報