近年，大家成日聽到「政治打壓」呢個詞，就算講嗰個人明明有犯法、有做錯都好，總之畀人告親都係「政治打壓」！好似「香港眾志」黃之鋒同羅冠聰咁，佢哋當年帶領學生衝擊政府總部後畀人檢控，事後一樣老屈政府「政治打壓」。近日，社民連主席吳文遠因為涉嫌喺上年立法會選舉投票日期間襲警而被「預約拘捕」，佢喺警局一行出嚟，又例牌話政府「政治打壓」；每次見到咁，囍雨都要問：「咁你到底有冇掟嘢先？有的話，又點算係『政治打壓』呢？唔好屈人啦！」

吳文遠承認向特首掟食物

囍雨睇番上年9月5日嘅報章報道，特首梁振英同太太梁唐青儀9月4日朝早去到半山羅便臣道票站投票時，遇到幾個社民連成員示威，期間吳文遠「向梁振英投擲三文治」！就算吳文遠自己喺Facebook都講，自己係「有」用吞拿魚三文治「扔梁振英」！

吳文遠喺警局行出嚟後，除咗例牌話係「政治檢控」外，亦「懶係型」咁話，搞抗爭示威「食得鹹魚抵得渴」。計囍雨話，呢啲係「死雞撐飯蓋」至真，真係「食得鹹魚抵得渴」，又點唔敢承擔罪責，仲要屈政府「政治檢控」呀？算把啦你！

「違法達義」只為口號 非建制派冇承擔

唉，查實自兩年幾前「違法佔領」，班非建制派話要「公民抗命」同「違法達義」開始，呢啲「敢做唔敢認」，以及「搬個民主藉口就隨便犯法」嘅歪風就傳遍香港。如果非建制派為政治理想而犯法，事後勇敢承擔罪責，雖然亦稱唔上英雄，但總算似返個人，但而家呢？永遠只賭口水，歪曲事實，靠呢班人幫香港「爭取民主」？佢哋知唔知乜叫「民主」呀？

原圖：Facebook截圖、Takungpao