「上帝要你滅亡，必先令你瘋狂」，「青年新政」梁頌恆同游蕙禎，喺立法會宣誓期間「玩嘢」兼「侮華」，最終被香港法庭D.Q.，實在大快人心！對稍有良知嘅人而言，受到咁大教訓，理應會改過向善，偏偏游蕙禎最近就喺Facebook示範咩叫死不悔改，大言不慚話「誓詞中僅有政權無人民，以支國稱之，恰如其份」（正字應為「分」，中文系畢業嘅游小姐寫錯字囉！）。囍雨睇到佢咁寫，腦海即刻浮現出五個字：「鬼拍後尾枕」！

游蕙禎「自爆」有違法

根據游蕙禎說法，「誓詞中僅有政權無人民，以支國稱之，恰如其份」，即係佢真係將「CHINA」讀成「支那」啦？咁佢之前對住記者話人哋歧視佢有口音，亦即係講大話，係欺騙市民同傳媒！游蕙禎而家喺單案去到終院前「自爆」有「拒絕／忽略」誓詞，有佢呢份袒白，咁法院應該可以加速審理單案啦？！

游蕙禎滿口大話都仍然上訴到終院，面皮之厚，有時都不得不佩服。大家唔好唔記得喎，游小姐選過區議員、亦選過立法會，簽過話會效忠特區同《基本法》嘅聲明都唔只一份啦，簽咗聲明又唔負責、講完大話又繼續上訴，呢啲唔通就係所謂「本土派」嘅特質？

終審上訴前自爆「拒絕／忽略」誓詞？

梁頌恆同游蕙禎畀人D.Q.，箇中原因好簡單，就係佢兩個違反《基本法》以及《宣誓及聲明條例》，喺立法會宣誓期間「拒絕／忽略」誓詞，結果失去議員資格。更重要係，佢兩個無論係喺高等法院，定係去到上訴法庭，其實都從冇就「拒絕／忽略」誓詞辯護過一句！係一句都冇！

最近，佢兩個最終宣布會上訴到終審法院，囍雨知道佢兩個有權咁做，但只係唔明，點解一個受過大學教育嘅年輕人游蕙禎，真係可以無賴到咁，竟然公然承認自己真係有「拒絕／忽略」誓詞之餘，但又繼續上訴囉！

人總會犯錯，尤其係年輕人一腔熱血，更加容易犯錯，但重點在於錯咗要肯認、肯道歉！游蕙禎到咗今時今日都唔識反省、唔認錯、唔改過，社會亦冇理由輕輕放過佢，佢可以唔認自己係中國人，但同時冇權去侮辱中國人，姑息佢、放過佢，等如縱容年輕人模仿佢嘅惡行！

原圖：RTHK