呢幾年囍雨寫文鬧「拉布」已經不下幾十次，呢呢呢，話口未完呀，而家立法會又喺度「拉布」喇，拉緊嘅仲要唔係敏感議題，而係涉及超過10,000個工人飯碗，以及渠務、水務，同埋公路維修等等與民生息息相關嘅工程項目！非建制派為咗個人政治主張不斷「拉布」，明顯係視市民大眾為「政治籌碼」啦！

為個人政治利益　影響上萬工人生計

話說而家「拉布」中嘅係立法會財委會轄下工務小組，小組正審議緊嘅項目係「基本工程儲備基金」整體撥款申請。未計其他因為呢個項目被「拉布」而排緊隊嘅1,000億工程，單係呢個涉款124億嘅項目，已包括9,000幾個正進行或計劃展開嘅工程項目。

呢124億工程撥款，全部都涉及民生，非建制派阻撓緊嘅，包括為行人天橋加建升降機嘅「人人暢道通行」計劃、渠務、水務及公路維修工程，以及影響公共安全嘅防止山泥傾瀉工程等。如果4月1號前未能通過撥款，政府就會冇錢埋單，過萬個工人即時失業或者被「拖糧」，而路陷、防止山泥傾瀉、河道整治同斜坡維修保養管理等，亦全部即時煞停！

非建制派冇理由阻「前期研究」

點解非建制係都要對「基本工程儲備基金」呢類民生項目下毒手呢？原來，呢班非建制派話，因為9,000幾個項目中嘅幾十項「有爭議」，所以要阻止撥款喎！等等，呢啲項目係咪真係「有爭議」先？非建制派口中「有爭議」嘅項目，主要係某啲策略性工程嘅「可行性研究」或「前期工程」，咁爭乜嘢議呢？

一般而言，策略性工程必須先做「可行性研究」或者「前期土地勘探」等等「前期工作」，拎到實際同科學化嘅數據，再評估同分析，先至可得出初步建造方案、預算同細節。即係話，如果冇「前期研究」，根本就冇資料交上立法會畀尊貴嘅議員審議；冇數據、冇評估、冇分析、冇統計，項目試問點交上立法會？

亦即係話，非建制派呢一刻冇數據、冇評估、冇分析、冇統計，咁其實佢哋即係反對緊啲乜呢？仲唔係「為玩嘢而拉布」？

圖片來源：星島日報