曾經有政壇前輩話過，步入選舉期，媒體隨即進入「瘋癲期」，真係一啲都冇錯！生果報某主筆今日又有奇文見街，喺社論質疑特首梁振英批評特首選舉參選人曾俊華嘅房屋政綱，表現猶如另一參選人林鄭月娥嘅「超級助選員」，認為咁做係變相用政府機器為林鄭助選喎。呢位主筆嘅論點真奇怪，社會有人提出政策建議，點解大家唔可以討論？有關政策建議牽涉現屆政府，特首又唔可以回應？如果表達意見等如「助選」，咁每日不同媒體咁多評論，同時亦對各參選人政綱諸多品評，咁又算唔算「助選」呢？

就政策內容提問　合情又合理

講真，涉事「評論」嘅謬誤實在太多，囍雨隨手已經執到三點極離譜嘅出嚟；首先，眾所周知，今屆政府工作嘅重中之重正正係房屋問題。曾俊華作為參選人，喺政綱提出要香港六成人居於公營房屋，正如梁振英話齋，呢個係極大嘅政策改動，一旦推行，未必有足夠土地之餘，更肯定會影響私人市場嘅房屋供應。如果香港樓價因為曾俊華嘅建議而波動，甚至可能影響整體香港經濟添！

喺呢個前提下，梁振英仍為特區首長，有禮貌咁要求曾俊華闡釋如何達到六成香港人住公營房屋嘅建議，根本就係合情合理！評論嘅係政策內容，而且建基於事實，更加唔係人身攻擊，到底有咩問題？梁振英「擺事實、講道理」，提出好多香港人都有嘅疑問，試問咁同「助選」有咩關係？

上屆政府冇介入選舉？

另外，呢位主筆又批評，梁振英點評政綱係「動用政府機械助選」。哈，真係好笑，講到動用政府機械助選，點講都唔夠上屆政府咁明目張膽啦！一般市民可能唔記得，但呢位主筆作為「資深傳媒人」，唔係咁健忘啩？

2012年2月8日，曾蔭權政府突然透過政府新聞處發稿，「證實」當時正參選特首嘅梁振英，喺2001年（記住係2001年呀！）擔任西九龍填海區概念規劃比賽評審時「嫌漏」同某參賽團隊「有關連」。發稿之後，相隔16分鐘，行政會議秘書處再透過政府新聞處，力撐被指「偷步買酒」嘅另一參選人唐英年無利益衝突！(請大家自行參考文末連結)

上屆政府係唔係「親疏有別」呢，囍雨唔敢講，不過當時政府嘅做法，的確係受盡質疑，有學者甚至話「當局處理手法並不尋常，予人有意『挺唐插梁』的感覺」囉。點解咁講？因為成件事重點其實係，參賽作品係用「不記名方式」送到評審手上，評審們根本唔知「邊份打邊份」；而更重要，當時涉事參賽隊伍事後亦被取消資格，完全不影響比賽結果。

事實證明，上屆政府發新聞稿話梁振英涉及「利益衝突」，根本同事實不符，正因為畀人唔公平嘅印象，當時社會先會有極大反彈。再者，根據後來陸續披露出嚟嘅評審文件，根本就搵唔到任何「利益衝突」嘅證據，「挺唐插梁」之說實在不無根據。

點評選舉參選人是國際標準

至於政府首腦應唔應該點評參選人，囍雨為求中立，暫時唔落結論，只係想提提大家，喺啱啱過去嘅美國總統選舉期間，時任總統奧巴馬不只一次批評共和黨特朗普，同時經常讚揚特朗普對手希拉莉。仲有仲有，台灣前總統馬英九，喺2016年台灣總統選舉期間，亦不只一次為同屬國民黨嘅候選人拉票，更點名批評當時嘅民進黨蔡英文「兩岸政策三天就變」，就算蔡英文嘅能源政策都被馬英九批評得體無完膚囉！

短短一個評論已見處處歪理，邊個喺度歪曲事實，以求達到為某啲參選人「抬轎」助選、邊個係真正「超級助選員」，心清眼亮嘅香港市民，應該可以分辨得到嘅！

參考資料：

1) 政府回應有關西九龍填海區概念規劃比賽查詢
2012年2月3日（星期三）
香港時間20時12分
http://www.info.gov.hk/gia/general/201202/08/P201202080502.htm

2) 行政會議秘書處回應傳媒查詢
2012年2月3日（星期三）
香港時間20時28分
http://www.info.gov.hk/gia/general/201202/08/P201202080506.htm