本土派舊年藉口為無牌小販維權，喺農曆年期間發動「旺角暴動」，相信大家都記憶猶新。今年無牌小販繼續湧現旺角街頭，幸好喺政府部門維持秩序下，總算無驚無險；不過今年農曆年喺旺角街頭，同樣有出現令人不安嘅一幕，就係激進政黨社民連竟然聲稱「身體力行」支持小販，所以要做無牌小販賣「關東煮」，點知轉頭見生意麻麻，又即刻上網自爆目的其實冇咁單純，而係要「籌錢打官司」！嘩，咁都得？咁咪即係「講大話」同隱瞞囉？乜咁卑鄙架！
 
反對派自稱「撐小販」嘅最大理由，係要為「基層市民」開闢一條財路，等市民可以靠雙手餬口。講到咁「崇高」，就算係受影響嘅市民，喺農曆年期間都會選擇忍幾日，畢竟香港大部份人都仍然好有人情味。
 
之但係咁，社民連作為政黨，幾時無啦啦做埋「基層市民」呢？基層市民就話想搵多個錢過年，咁你社民連呢？講到底咪係為咗個「錢」字！囍雨冇屈佢哋架，係社民連主席吳文遠自己喺社交網站拍片直播講，話擺檔賣「關東煮」係要「籌錢打官司」！係囉，咁你又唔一早講明？
 
「籌錢」並唔係一件醜事，但係口不對心，敢籌錢又唔敢認，呢個就係笑話喇。社民連最初喺自己Facebook專頁上並冇提及擺檔係為籌錢打官司，一直只係話「用行動支持小販政策」，仲話自己建議政府檢討改善現行小販政策，喺農曆新年期間特事特辦容許升斗市民街頭擺賣、展現街頭特色。
 
藉口「堂而皇之」兼動聽，其實都係為搵錢。計囍雨話，社民連今次咁做，無非係想繼每年「七一遊行」非法街頭籌款後，再為自己開另一條財路，根本係處心積慮，但就選擇隱瞞公眾。
 
做得政黨，盤數當然要清晰。社民連早年取消「公司註冊」，而家只係用「社團註冊」形式運作，盤數係點，從來唔使向公眾交代。今次社民連喺旺角做無牌小販，把口實話係「公民抗命」，但咁又點？咁就唔使交代盤數咩？佢哋唔係想學「佔中三人組」咁，一直收收埋埋「佔中」盤數呀？
 
嗱嗱嗱，社民連成日講到自己幾咁清高，更加站喺道德高地違法行為合理化。囍雨認為，為咗證明佢哋「一路走來，始終如一」，最好方法就係盡快代成個黨嘅財政狀況，點好再收收埋埋囉！

圖片來源：社民連FACEBOOK專頁截圖