今朝，環保觸覺義務總幹事譚凱邦出席港台節目，討論發展郊野公園邊陲地帶時話，香港現時嘅房屋、土地問題係源自於單程證每日150個額度，令到人口增加同公屋輪候時間長，仲話如果政府唔爭取取消單程證制度，佢哋對郊野公園係一寸都唔會讓。不過，囍雨對佢嘅講法就唔係好認同，譚凱邦講嚟講去「三幅被」，佢究竟知唔知攞單程證來港定居嘅係咩人先？果啲絕大部分都係香港市民喺內地嘅親人，譚凱邦連家庭團聚都唔畀，好似惡咗啲喎！

九成持單程證人士 為來港與家團聚

就住單程證配額嘅問題，囍雨都翻查過去幾年單程證嘅數字，喺2015年透過單程證落嚟香港嘅數字有38338人，平均每日就105人;再睇前一年，喺2014年就有40496人，平均每日就111人。似乎已經唔係譚凱邦係咁提嘅五萬人喇！再者，申請單程證落嘅限制一啲都唔寬鬆，簡單講唔係想落就可以落嚟，根據政府數字，現時約九成透過單程證落嚟嘅內地人都係以家庭團聚為理由，站喺人道立場，有乜理由反對人哋家庭團聚先？係咪外國就嚟得，內地就唔可以嚟呢？

事實上，申請單程證嘅人內地當中，有唔少都係想夫妻團聚；將心比己，夫妻長期分隔兩地點睇都唔係好事，就算申請到單程證，一般都要三、四年先可以申請到落嚟同丈夫或者妻子團聚，相比起香港人申請外國配偶嚟香港，只要佢哋喺香港有親生子女或者法律認可嘅領養子女，基本上就可以擁有香港居留權，好多時連等都唔駛點等！兩者都係夫妻團聚，但內地人來港嘅限制就大好多，如果譚凱邦唔畀內地人來港團聚，咁外國人佢又係咪唔畀呢？如果連夫妻、家庭團聚都唔畀，咁做法又係咪合乎人道、人情先？

至於譚凱邦講到郊野公園低生態價值與否無客觀指標嘅問題，其實同佢一齊上港台討論郊野公園嘅前長策會成員劉炳章都話，用客觀、科學嘅指標調整郊野公園範圍係好事，囍雨認為而家發展計劃只係處於萌芽階段，大家對點樣定郊野公園範圍可以多提意見，未傾就反對，咁土地、房屋問題係咪由佢繼續發酵先？

而家公屋輪候冊有成29萬宗，成20萬人住喺居住環境惡劣嘅劏房，任何拓地、覓地嘅方案都唔應該忽略。無錯，我哋係要保護高生態價值嘅郊野公園，但喺低生態價值嘅公園，究竟應該繼續由佢喺度曬太陽，定係攞出嚟興建公屋、非牟利老人院嘅「非地產項目」，大家應該好好思考，因為呢個問題唔只關乎我哋，更係關乎我哋下一代能唔能夠安居樂業嘅大問題！

原圖：RTHK