有請小鳳姐！「熱烈地彈琴熱烈地唱…..！」因乜囍雨咁好唱口？之唔係青年新政畀上訴法庭拒絕容許佢哋就宣誓案上訴到終審法院囉；雖然，佢哋兩個係可以直接去終審法院上訴，不過囍雨仍然好心涼、好開心。果然，喺上訴法庭拒絕佢兩個申請後，主角之一嘅梁頌恆即係彈出嚟話會上訴到終審法院，仲聲稱會聘請英國御用大律師同埋公民黨黨籍嘅資深大律師李志喜加入法律團隊喎。其實講到呢度，佢哋已經露晒底，就等囍雨再次踢爆佢兩個，等佢哋唔好再遺禍人間啦！

搞眾籌又拒交代法理依據

其實之前囍雨都好似寫過吓，梁、游一直聲稱自己上訴有新法律觀點，但觀點係乜呢？SORRY呀，冇人知囉。都係嗰句，如果你係用自己錢上訴，外人真係理得你有乜觀點吖，法官受咪得囉；之但係你兩個而家冇錢，又搞眾籌吖嘛，咁又唔同講法喇，攤大對手問人拎錢打官司，在情在理都應該向市民交代下有咩新觀點啩？否則無啦啦捐錢畀你，最後咪又益咗幫你兩個嗰班律師？

梁、游喺眾籌事件上最乞人憎之處，在於佢兩個不斷發放似是而非嘅所謂「新消息」出嚟呃人；好似今日佢兩個話會聘請英國御用大律師同埋公民黨黨籍嘅資深大律師李志喜打到去終審法院咁，請問一句，錢呢？你兩個根本就冇錢，試問仲點請得起呢兩位大狀？如果冇錢請呢兩位大狀，你兩個又點可以拎嚟做你兩個眾籌嘅「賣點」？呢個咁簡單嘅因果關係，真心希望香港人睇清楚囉。

上訴法庭否決申請理據充份

好，就當唔好咁市儈成日講錢，又同你兩個講講道理吖。上訴法庭今日頒下嘅判詞講明，梁、游一方以「重大公眾利益」為由申請上訴去終審法院，但三名上訴法庭法官講到明，單憑「重大公眾利益」呢一點，已冇合理勝訴機會，不足以成為批准上訴嘅理由。上訴庭又認為，梁、游一方單以普通法原則理解人大釋法是錯誤引用，重申喺「一國兩制」同《基本法》下，人大常委會有權解釋《基本法》，香港法庭不可以質疑人大處理《基本法》條文嘅權威。

講得好清楚啦，上訴法庭已經講到明，佢兩個基本上冇勝訴機會，所以唔值得畀佢兩個上訴去終審法院。由始至終，佢兩個都冇提出過任何新嘅法律觀點，藉以證明佢兩個喺宣誓期間所作所為並非違法《基本法》，由頭到尾都「冇新觀點」，但就反反覆覆對外宣稱自己「有新觀點」，叫人畀錢佢哋繼續打官司，你話，呢兩個人仲值唔值得信、仲有冇「品德」可言？

嗱，錢就係大家嘅，你哋要捐畀佢兩個打官司，囍雨都無從置喙。囍雨呢篇文只係想再一次揭露「青年新政」呢兩個人嘅虛偽同不堪啫，至於捐唔捐，都係嗰句：「你諗你」囉！捐，就係畀錢班大狀使；唔捐，留返個錢喺身邊，可以做更多有意義嘅事，點樣叫做用得精明，唔使囍雨多講喇啩？

原圖：大公報