特首梁振英述職，當唔同國家領導人都不約而同地肯定梁振英工作嘅時候，有啲媒體可能鍾意報道花絮多過正經嘢，係咁攞住外交部部長王毅句「年輕有為」嚟講，其他嘢無論係處理內外複雜環境好、維護經濟發展社會穩定好還是制止「港獨」好，總係覺得唔重要；甚至國家主席習近平話尊重梁振英因家庭理由唔連任都好，啲人就係選擇唔信，係要將特首「有為」講到變「無為」，囍雨其實覺得好「無謂」！

無視事實的「陰謀論」

囍雨明白，喺而家嘅政治世界係敵我分明，就算對手值得讚揚都好，都唔會對對方有半句肯定，否則自己啲支持者就會唔鍾意。不過，囍雨有樣嘢真係覺得好無奈，當特首梁振英話因為家庭理由唔連任嘅時候，大家唔相信；之後港澳辦、中聯辦出聲明充分肯定同高度評價梁振英，大家又當睇唔到，甚至可能覺得呢啲唔係中央嘅意思。

好喇，到而家國家主席習近平、總理李克強、外交部長王毅都充分肯定梁振英工作嘅時候，啲人係咪仲要一廂情願地繼續以為中央唔信任特首呢？無論幾多事實擺在眼前，有啲人總係以「陰謀論」對待事件，而不願意相信眼前見到嘅事實；如果特首真係無所作為，囍雨相信佢就唔係得到「有為」嘅評語，而係被國家領導要求檢討。

更加重要嘅，係特首因為家庭理由而選擇唔爭取連任，社會有部分人士毫無同理心，完全無關懷特首嘅家庭處境，反而基於特首家庭問題而「創作」出唔同嘅故事，然後仲要竊笑一番。有啲人可能覺得自己「食花生」食得好開心，但囍雨想問，如果係大家屋企有事但其他人仲要喺「傷口灑鹽」，大家仲笑唔笑得出呢？「惻隱之心，人皆有之」，囍雨覺得冇都算喇，但唔好show出嚟話畀人知自己冇咁無恥嘛！

其實國家領導人都肯定CY過四年幾嘅適度有為施針，認為佢喺經濟、民生、房屋、扶貧、科技創新等範疇做咗重要貢獻，甚至喺複雜嘅內外環境下，準確落實一國兩制同《基本法》規定，仲要做好「反港獨」工作，如果咁都唔算「有為」，特首呢份工實在都唔知點可以做得好！

原圖：chinanews.com