噚日，審理緊「旺角暴動」一案嘅女裁判官香淑嫻（香官）收到一封寄去九龍城裁判法院嘅「疑似恐嚇信」，信中只有一把鎅刀，冇講咩事，亦冇其他物件，法院將事件交畀警方跟進。老老實實，明眼人都知封信唔係善意啦，好人好姐做乜寄把鎅刀畀人先，而且收果個官仲要係審理緊「旺角暴動」嘅法官。件事究竟係點，警方一定要查個清清楚楚，囍雨必須講，「恐嚇」法官係一件嚴重影響香港法治嘅罪行，如果裁判官真係受恐嚇信而影響，咁仲成世界嘅？法治、司法獨立係香港嘅基石，絕對唔容許有人破壞！

70年代葛柏案 法官無懼恐嚇、公正辦案

好似香港70年代嘅「葛柏案」咁，當時審理「葛柏案」嘅係楊鐵樑大法官；根據之後楊官所講，當時案件引起社會極大關注，開審無耐佢就收到一封語帶恐嚇嘅「匿名信」，要求楊官重判葛柏。但係楊官並冇因為呢封「匿名信」而退縮，反而當庭譴責寫信人嘅行為係藐視法庭，仲申明自己唔會畀恐嚇影響到佢嘅判決。到咗判案前一日，楊官再次收到類似嘅「恐嚇信」，楊官於是再次重申立場，而且勇敢嘅楊官仲冇要求人身保護，足見香港法官為咗守護法治，絕對係無畏無懼！

大家試想一下，如果當時楊官因為擔心自己安危，不問因由、證據咁重判葛柏，香港會變成點？可能大家會因為葛柏被重判而大快人心，但同時香港嘅法治亦宣佈死亡。楊官回憶當時情況指出，這些信件正反映出市民對貪污極之痛恨，然而「理性而公平的審訊十分重要」。

法治嘅可貴之處在於司法獨立，司法獨立就係司法機構人員例如法官喺唔受影響嘅情況下，審視各方證據然後作出公正裁決；如果只要有人恐嚇、威迫法官就妥協，咁司法又何以獨立，法治又如何彰顯呢？

為咗捍衛香港嘅法治，法官一定要企硬，堅守司法獨立、公正判案嘅原則，而警方一定要嚴正徹查，將意圖恐嚇法官嘅疑犯緝拿歸案！囍雨真心認為，自從2014年違法佔領行動之後，有啲人好似以為自己有政治理念就乜都得，違法佔領街道又得、衝擊警察又得、掟磚又得、恐嚇選舉主任都得！而家連裁判官都想恐嚇，咁落去香港呢個法治之都，遲早變成某啲人可以肆意妄為嘅犯罪之都！

原圖：RTHK