「旺角暴動」之後，警察就事件成立檢討委員會，喺「行動」、「武器、裝備及訓練」，以及「支援」三方面作檢討。一聽到武器、裝備，非建制派班人即刻非常緊張，上綱上線話擔心警察增加武器、裝備係要嚟「對付」示威者，進一步打壓民主云云。咪住先，呢班人到底可唔可以搞清楚個問題，而家係因為示威愈來愈暴力化，所以警察先針對需要更新裝備，唔係唔畀示威喎！

講真，劈頭就話警察更新裝備係用嚟「對付」示威者嘅講法，呢個說法真心好唔公道。自從79日「違法佔領」之後，次次遊行、集會都畀班「勇武派」騎劫，將和平示威拉向暴力。喺香港，警察有責任喺公眾集會度維持公眾秩序，如果示威者硬要衝出馬路破壞公眾秩序，咁類似衝突真係無可避免。事實上，勇武派作為衝突嘅始作俑者，如果唔係佢哋衝出馬路，同埋做埋晒啲暴力及違法行為，警察根本唔需要阻撓示威者。呢班人點解要「衝出馬路」，心水清啲都明啦，咪又係要玩「佔路」之嘛。

就攞「旺角暴動」嚟講，「勇武派」全副武裝，頭盔眼罩武器樣樣齊，警察單靠胡椒噴劑，當時根本控制唔到人群秩序！仲有呀，喺整個衝突過程中，「勇武派」「掟磚」、「掟雜物」樣樣齊，有睇過「旺角暴動」相關影片都知，警察畀磚頭掟中而血流披面，仲見到成班人追住已經跌咗落地嘅警察嚟打同掟「卡板」，種種嘅情況都顯示，警察成立檢討委員會，檢討「行動」、「武器、裝備及訓練」同「支援」都非常合理。

有人擔心警察會濫用呢批「裝備」嚟對付示威者，但咁講其實有少少「未審先判」味道。香港警察往績優秀，《世界競爭力報告書》中，其中一個指標係關於警察服務可靠程度，香港警察喺全球140個國家裡面排名第6，成績相當唔錯，當然仲有進步空間啦！睇一項唔夠，睇多個國際調查囉！位於英國倫敦嘅公共政策智庫列格坦研究所，每年都會公佈「全球繁榮指數」，2015年報告就顯示，香港喺全球 142 個國家／地區中，「安全與保安」表現排名第一，而且係連續幾年第一！

點呀，冇話可說啦，你班人仲憑乜話香港警察會「濫權」先？再者，之前保安局局長黎棟國都提到，警察有嚴謹嘅武力使用守則，又有現場成班專業指揮官作評估及判斷，濫用裝備？冇可能囉。講真，警察買批裝備返嚟都係備用，到底有咩咁好怕？如果之後嘅示威唔涉及暴力，批裝備根本冇機會用得上；之但係，示威一旦出現衝擊、暴力，呢批裝備就大派用場。邊啲人唔想警察有新裝備？邊啲人心中有鬼？唔使講，市民都明晒！

圖片來源：大公報