「老師」一直以嚟畀我哋嘅感覺都係「循循善誘」、「以理服人」；可惜世事無絕對，呢個世界總有啲「老師」罔顧專業操守，滿口歪理，韓連山就係好例子。韓連山本身係退休中學老師、教協監事同保衛香港自由聯盟發言人，喺國教事件裡面「一戰成名」，被喻為「泛民軍師」。唔知係咪因為「吃過甜頭」所以有啲飄飄然，韓連山講嘢愈來愈過火，經常大放厥詞，毫無道理可言。囍雨真係想問，係咪因為自己係老師，佢就覺得佢自己講咩人哋都會聽、會信先？

舉個例，好似「林慧思爆粗事件」咁，片都放晒上網，林慧思「講粗口」可以話係鐵證如山，但韓連山竟然可以「死撐」話條片係「假」。嘩，咁都講得出口？如果佢話林慧思只係一時衝口而出，希望大家畀個機會都仲講得通，但韓連山竟然想將事實變成假象，會唔會Over咗呢？

事實上，韓連山本身言行，經常都持「雙重標準」。當初佢「反國教」嘅時候就話國教係洗腦，唔可以入學校；但調番轉啲學生講「港獨」，佢竟然話根據《香港教育專業守則》，教師可以畀學生討論，等佢哋自己判斷對錯喎！大哥，國教係認識國家、社會嘅科目，你就話唔推行得，但肯定違法，甚至涉及暴力同流血嘅「港獨」，佢就話可以討論，呢啲咩邏輯呀？係唔係將啲學生推去違法同受傷邊緣先？嗱，唔好話畀我聽咁叫做「保護學生」喎！

講番最近嘅宣誓案，囍雨唔知係咪因為韓連山係咪「癲倒是非」嘅心太強，竟然撲出嚟寫文「盲撐」梁、游，話拒絕誓言、宣誓侮辱全球華人事件只係「小風波」，真係聽到囍雨火都嚟埋。講粗口嘅你要幫，講「港獨」你話OK，身為老師見到有人侮辱國家你又覺得係「小事」，啲思維真係完全違反常理。

囍雨唔明白韓連山點解要咁講嘢，但一個專業、有道德嘅前專業教育人員，應該識得判斷是非曲直，而唔係一味因為政治立場而「反」同「鬧」；對於呢啲誤人子弟、扭曲是非嘅所謂教育工作者，我哋一定要發聲直斥其非，唔係點對得住下一代呢？！　

圖片來源：RTHK