政府昨日宣佈取消低收入在職家庭津貼計劃（低津計劃）中嘅「離港限制」，回應基層市民就計劃提出嘅其中一樣訴求。偏偏，身為社福界立法會議員嘅邵家臻就講到好似唔認同政府做法咁，今朝喺電台批評話政府之前拒絕回應取消「離港限制」，而家突然取消就好似拔河中突然放手一樣，評論政府今次行動係要「收買人心」。佢仲話，雖然取消限制係好事，但都覺得「戚戚然」喎！吓？唔係呀嘛？咁都有得鬧？邵家臻身為社福界議員，乜唔係應該企係市民角度咩，關注個政策幫唔幫到市民嘅咩？點解佢會為有更多基層受惠而覺得「戚戚然」？定佢已經反政府反到上晒腦，搞到是非不分？

邵家臻話政府修訂「低津」係「收買人心」，查實呢個世上有邊個政府施政係唔想得民心架？如果政府真係因為今次修訂而得到民心，咁都好合情合理吖，請問有咩唔妥呢？用「收買人心」嚟質疑政府，其實非常強詞奪理囉。退一萬步講，就算「夾硬」要話政府「收買人心」，但係取消「離港限制」真真確確惠及到更多基層市民，作為資深社工同社福界議員，邵家臻唔通想政府避嫌收返個修訂？繼所謂「土地政策專家」姚松炎錯完又錯，畀人恥笑係政治凌駕專業後，家陣終於輪到邵家臻，呢兩個所謂專業人士真係臭味相投喎！

再講，邵家臻形容政府今次修訂「低津」，情況就好似喺拔河比賽中突然放手一樣，無啦啦將社福界拉到去政府對立面。其實大部份對公共政策有少少認識都知，社福政策要花時間研究，全因為所有開支都涉及公共財政，即係公帑，政府有責任要慎之又慎，理解香港承擔能力。至於今次取消「離港限制」，由於涉及公共財政唔多，做得快都好合理，唔通政府做嘢官僚啲、慢啲先啱佢心水？

非建制陣營為鬧而鬧，同場工聯會陸頌雄就公道好多！佢認為今次調整，可以惠及基層，就算與選舉有關都唔會係壞事；仲話今次政府快速回應訴求係一個「突破」，更建議政府進一步改善其他福利及勞工政策。陸頌雄本身都係社工，可惜自己個界別就被邵家臻啲咁嘅「專業人士」把持，都咪話唔眼冤。

係又鬧、唔係又鬧，做得唔好鬧、做得好唔讚兼繼續又大鬧，乜社工專業訓練係咁嘅咩？

圖片來源：RTHK