講起行政、立法關係，班泛民劈頭就批評特首梁振英「帶頭」破壞行政、立法關係，查實呢個係唔係事實呢？囍雨覺得好值得深思。好似今日下午嘅立法會酒會咁，梁振英答應出席，講明爭取同立法會議員喺不同場合交流，但非建制陣營就大張旗鼓拒絕出席，其他唔多講，剩係呢種態度已經畀到答案大家，到底係邊個唔想改善關係。

記得囍雨之前都寫過，事事盲目忍氣吞聲，任由立法會議員踰越底線都唔提出警告，呢個唔係叫「改善關係」。家陣市民見到嘅係，政府多次邀請非建制派議員出席唔同場合交流見面，但議員們就次次都請政府食檸檬，老實講，佢哋有咩資格話政府「破壞行政、立法關係」？講唔通囉。

非建制派多次拒絕好意

講返紀錄，梁振英唔係無搵佢哋溝通，近年就多次積極爭取同非建制派人士見面，先唔講今日下午嘅立法會酒會，就今年五月之嘛，梁振英宴請全體立法會議員喺禮賓府食晚飯，結果絕大部份非建制派議員都拒絕出席，時任立法會議員嘅民主黨劉慧卿仲話飯局只係「政治表態」云云。

推返到2015年，政改期間政府主動邀請泛民議員去深圳同中央官員見面，直接同中央溝通，但泛民提出「會面建基於中央有意在政改問題上讓步」嘅前提，結果又係勁多個話唔去。大佬呀！傾都未傾就要人讓步，政治唔係咁吓嘛？仲有仲有，大家記唔記得，上屆立法會嘅非建制派多次揚言要搞「不合作運動」，會喺所有立法會嘅委員會會議全面「拉布」，仲講明要梁振英同政府唔好過等等。借問聲，呢啲叫唔叫「主動」破壞關係？

多次趁機羞辱特首

大事當然唔只呢啲，記得之前梁振英就施政報告諮詢，公民黨特別玩嘢，話有意見都唔會畀梁振英，結果張份意見交去畀政務司司長林鄭月娥。梁振英冇計較呢啲，事後亦有問林鄭月娥拎份意見去睇，囍雨又想問多次，到底邊個破壞緊行政立法關係？仲有呀，梁振英舊年曾經認公民黨食早餐傾政事，時任公民黨黨魁梁家傑食完出來，立刻批評梁振英佢哋是係「為做會面而做」，囍雨唔知佢哋傾咗乜，只係知道，任何人如果真係有心改善關係，絕唔可能呢頭見完，嗰頭就向記者狂數對方不是囉！

而家局面非常清晰，非建制派請又唔到、唔高興就「掟嘢」兼「拉布」，唔通為咗改善行政、立法關係，行政當局真係要乜都就晒佢哋、無限讓步？囍雨始終認為，改善行政、立法關係雙方都有責任，得一方面釋出善意絕對唔夠，要雙方都釋出善意件事先會成功。囍雨唔奢望一次可以改善大家關係，但至少畀我睇到非建制派願意坐低見面傾計吖，一味鬧、鬧、鬧，請問有乜作用呢？

圖片來源：大公報