末代港督彭定康（肥彭）日前嚟香港，當然就唔係食蛋撻咁簡單啦。佢今次係應舊部陳方安生邀請出席以「香港管治：禮崩樂壞？」為題嘅論壇。一聽個論壇題目，心水清嘅朋友都知道，又係班港英份子為反對派搭棚嘅大龍鳳，事後果然一如所料啦，論壇吸引大批激進反政府人士出晒嚟，包括壹傳媒黎智英、民主黨創黨主席李柱銘、前廣播處長張敏儀、前行政立法兩局議員李鵬飛等，連被取消議員資格嘅梁頌恆亦有現身。不過，唔知好嬲定好笑，肥彭嘅言論竟然令呢班戀英反中人士跌晒眼鏡，事關佢對於港獨、宣誓風波嘅立場，竟然同香港建制派都頗為接近喎！

肥彭狠批「港獨」無可能

肥彭講咩呢，佢喺一場演講上面狠批「港獨」係錯誤，仲話香港獨立係無可能，因為《中英聯合聲明》已經講得好清楚香港領土主權屬於中國。雖然囍雨一向對肥彭都抱有懷疑態度，但亦絕對唔會因人廢言，老實講，佢公開反對「港獨」，情況就好似大大巴摑落班港獨分子度咁，真係睇到心都涼晒！

至於講到「青年新政」梁、游宣誓拒絕／忽略誓詞，以及辱華宣獨一事時，肥彭就更加唔客氣，除咗表示唔認同，更直言宣誓係莊嚴嘅事，又舉北愛爾蘭嘅新芬黨做例子，話有國會選舉當選人，因為拒絕宣誓向女皇宣誓效忠而被褫奪議席。呵呵，唔知梁頌恆同游蕙禎，同埋一直盲撐佢兩個嘅人聽到有咩感覺呢？

仲有仲有，肥彭仲公開表明，話認為《基本法》同「一國兩制」喺香港落實得唔錯，當陳方安生同李柱銘等舊電池連埋立法會班非建制派日日講「一國兩制 明存實亡」唱衰香港嘅時候，肥彭竟然肯去講公道話，肯定《基本法》同「一國兩制」喺香港落實嘅情況，客觀上自然係令到陳方安生等人嘅如意算盤打唔響啦，再一次，囍雨真係心都涼晒，SO HAPPY~~

一邊講法治、一邊讚佔中 前後說法矛盾

不過咁，雖然肥彭今次講返少少「人」話，但囍雨亦唔係完全認同佢今次來講嘅所有言論。好似當佢講到「法治」嘅時候，竟然一邊話法治係平民同當權者都要守法，另一邊又讚揚「違法佔領行動」係成熟嘅爭取民主運動，仲搶到道德高地添！嘩，大佬，你講咩呀，完全唔明囉！

嗱，當權者要守法，呢個就當然啦，香港有邊個當權者唔守法先？但當權者守法，點解另一方面口頭上爭取「民主」嘅人又唔使守法呢？肥彭讚違法佔領行動佔據咗「道德高地」，但就冇解釋到，點解呢班人唔使守法。佢唔會覺得，攞住個民主招牌就可以無視法治啩？

不要完全相信外國政客

唉，查實英國人玩政治叻好多人都知，政客「話中有話」、「棉裡藏針」亦不少，相信肥彭係想暗示當權者唔係「依法管治」，所以違法佔領可以佔據到道德高地囉。囍雨真係想反問肥彭，由當時政府提交政改報告，到後來人大作出「8.31決定」，有邊一部份係「非法」？邊一部份唔係「依法處理政改」？違法佔領精粹，認為「8.31」決定唔可以滿足到自己政治訴求，所以訴諸暴力同犯法行為，肥彭作為資深政治家，冇理由唔明箇中問題係乜。

所以話，政客「棉裡藏針」就係咁解囉！事後有分析，話肥彭目的係保持傳統泛民，以免佢哋因為港獨派種種卑劣行為而被拖累。囍雨唔知係唔係事實，喺度只係想講，肥彭身份係英國政客，由內到外佢都係一個只會顧及英國利益嘅英國人，囍雨唔會因為國籍而廢言，但更加唔會因為外國政客一時講咗啱聽嘅就飄飄然。

香港嘅事，始終係中央政府同香港自己搞掂最好。用香港腳走好香港路，只有咁樣先至活動自立自強，歷史一次又一次話畀我哋知，依靠外國勢力，只會死路一條，唔係成為附庸，就係成為別人謀取自身利益嘅棋子，總之就冇好結果啦！

原圖：takungpao