嘩！巧威威呀！成日將做過「廉署調查主任」掛喺口邊嘅民主黨立法會議員林卓廷，尋日又成功喺立法會用站立方式成立專責委員會調查「廉署李寶蘭」事件。聽落就係威係勢，不過眾所周知，林卓廷一直係靠消費「廉署」呢個金漆招牌上位，廉署前一姐李寶蘭被取消「執行處首長」署任單嘢，根本就不涉不法行為，更加唔關佢係唔係正調查涉及特首嘅UGL事件。廉署真「一哥」、廉政專員白韞六今日終於忍唔住，喺報章撰文怒片林卓廷，而家就睇睇白專員講咩先！

抹黑廉署招牌 其心可誅

搞到白專員發火親自執筆投稿反駁，明眼人都知林卓廷有幾過份。白專員劈頭就話，對於林卓廷種種無理指控，已多次公開嚴正澄清，由始至終李寶蘭事件都係「一件單純人事管理事件」。白專員話，李寶蘭嘅署任，從來都「不帶可獲晉升含意」，由始至終都係以「方便行政」方式署任執行處首長，而喺李寶蘭署任廉署「第二把交椅」期間，白專員幾乎每星期一次，有時甚至會3至4次會見李寶蘭去討論各項管理事宜。

白專員話，去到2016年7月，佢撰寫李女士份評核報告，結論係對方未能通過測試，於是安排李寶蘭返回原來崗位，重掌執行處處長（私營機構）一職。仲有仲有；白專員仲話，根據《廉政公署條例》第8（1）條，廉政專員撤銷李寶蘭署任，由於唔係屬於實質委任，所以根本唔需要特首梁振英「批准」，所以說更加冇林卓廷所講嘅「默許」。

仲有，白專員文章最重要嘅一項訊號，就係廉署調查貪污投訴，一向高度專業、不偏不倚，而且所有貪污調查必須根據既定程序向「審查貪污舉報諮詢委員會」匯報，調唔調查一單案件，並唔係廉署執行部門話到事！所以，林卓廷話李寶蘭係因為正調查特首嘅UGL事件而被解除署任，可以話係完全失實嘅指控，簡而言之，林卓廷一直都係「抽水大過天，亂吹當秘笈！」

港英年代廉政專員都撐白韞六

查實呀，港英年代做過廉政專員嘅施百偉，早排應邀嚟香港時亦表明，雖然自己唔清楚事件來龍去脈，但佢個人認為，李寶蘭署任執行處首長一年多後被取消署任「並非不尋常」，有時為咗方便行政，署任時間可以很長，以佢自己為例，佢都曾經擔任「署理法律專員」超過一年，但最終都冇正式就任。

佢仲話，認同白韞六話廉署職員嘅個人表現是「機密」嘅說法，甚至廉政公署嘅工作有時亦都係「機密」，所以唔應該喺公眾領域隨便議論，而白韞六亦唔需要為呢單咁嘅事「下台」！

林卓廷，你聽到未呀！而家前任廉政專員都係咁講呀，仲要係你班非建制派非常崇尚，話係香港最好年代嘅殖民地時期廉政專員呀。老實，囍雨亦認同，殖民地年代，港英政府的確有為香港建立唔少值得保留同優良嘅制度，呢點相信大部份人都認同，正因為咁，回歸之時，國家咪容許呢啲制度全部順利過渡囉，如果唔係點會有「一國兩制、港人治港」先？

如果真係珍惜廉署、愛廉署，林卓廷呢班咁嘅人唔該即刻收手，唔好再借廉署嚟抽水喇，你哋而家所做，唔單止一啲都唔正義，仲破壞緊廉署行之有效嘅運作模式。請民主黨同其他非建制派收手，等政治回歸政治、執法回歸執法，唔好再消費廉署呢個香港人引以自豪嘅基石啦！

圖片來源：香港電台即時新聞