講起農曆新年，唔知大家諗起咩呢？對唔住，囍雨一向比較負面，自從舊年農曆新年，有班本土派以「為小販爭取權益」為名發起旺角暴動後，囍雨到咗今日仍然不時將「新年」同「暴動」扯上關係。今朝聽收音機，知道政府計劃嚟緊農曆新年，喺旺角麥花臣球場搞熟食墟市，雖然個計劃仲係構思階段，當區區議會對計劃亦有保留，搞唔搞得成都未知，但至少證明咗，政府唔係唔去回應市民訴求，點計都值得鼓勵。

香港對墟市有需要

其實，近年唔少民間團體都倡議政府喺合適地區設立墟市，一方面畀市民多個行街、購物嘅選擇，唔使次次都係行商場咁悶；另一方面，因為墟市一般經營成本較低，設立墟市亦令到基層市民可以有機會做吓小生意營生。咁講啦，囍雨非常認同，政府長遠嚟講點都要回應設立墟市嘅訴求，雖然香港地少人多，合適地點未必咁易搵得到，但由於社會對呢方面嘅訴求聲音唔細，政府未來點都要有一套既可以方便小販謀生、畀市民去墟市幫襯之餘，又唔影響公眾安全嘅「墟市」政策。

今次政府提出喺麥花臣球場搞熟食墟市，點睇都係破格之舉，如果能夠做到「試金石」固然係好；但無論結果如何，呢個作為起步都值得鼓勵，始終，要成立一個具規模，而又安全嘅墟市，尤其係熟食墟市，其實一啲都唔簡單。大家唔好以為搞個墟市好EASY，遠嘅唔講吖，講返大家都好熟、位於台北嘅各個夜市，由法例到管理，各樣安排都相當複雜。

台北點管墟市？

囍雨查過少少資料，台北市各個夜市雖然好似好有規模，但其實問題都唔少。台北市有條法例叫〈攤販管理自治條例〉，可以管到部份受管控嘅攤販，但其實，各個夜市裡面其實有唔少非法設置嘅攤販，呢啲攤販冇統一主管機關，搞到要好多部門聯手先可以監管得到。另外，唔少台北嘅夜市都會組成自治會，負責收取清潔費、幫忙管理夜市秩序同交通等等，但由於唔係每個攤販都必須加入，最後都會出現好多爭拗同問題，甚至引來黑社會介入添！

點都好，囍雨始終覺得今次喺旺角麥花臣球場搞熟食墟市係好開始，如果政府可以將熟食墟市概念推展到旺角以外嘅區域，咁就真係VERY GOOD啦。雖然，現時仍然有好多問題未解決，包括即使成功設立，仍然唔可以明火煮食，對顧客吸引力冇咁大等等。咁又係嘅，明火煮食，即係有石油氣、炭爐、煤氣爐出現啦，呢啲設備喺人多嘅墟市出現實在太危險喇，個墟市臨時喎，唔係永久喎，安全設施可能未必在短時間內可以做到好足啦，咁聽落暫時唔可以明火都算合理呀！

圖片來源：大公報