「青年新政」兩件人形物體畀人D.Q.，相信香港唔少香港人同囍雨一樣咁開心，老實，兩位「前」議員嘅嘢，過去幾個星期已經寫得太多喇，囍雨自己都有啲厭。本來法院判咗，理應就相安無事，點知包括民主黨前立法會議員何俊仁在內嘅政客，硬要搵啲藉口為兩件人形物體護短，唔出手鬧吓佢真係對唔住自己。

何前議員今次又講乜呀？佢今朝喺電台節目話喎，今次「青年新政」單官司令佢有啲懷疑，因為以前好多人做過「類似」宣誓，但立法會主席都冇出聲，質疑政府一早知道都唔出聲，認為咁樣好陰濕、好唔道德喎！

三大道理駁何俊仁

嘩，何俊仁，枉你從政多年，本身仲係律師，啲咁嘅歪理都講得出嘅？第一，「青年新政」今次宣誓期間「辱華」，違反咗《基本法》同〈宣誓及聲明條例〉；呢兩樣法例，本身一直存在，唔係政府為「青年新政」度身訂造，法例一早擺喺度，人人可以睇，做議員更應該睇，何俊仁憑乜話政府「唔出聲」收埋？傻的嗎？

第二，以何俊仁嘅邏輯，係咪即係指犯法「唔捉」、「捉唔到」，就會鼓勵犯法？如果係咁解的話，囍雨都唔反對，如果唔係，香港警察又點會咁努力執法吖，明嘅！不過，何俊仁意思肯定唔係咁，佢擺明係話：「唓，以往都係咁衰架啦，你又唔捉，做咩而家捉我喎，你唔啱！」

大佬，有冇咁無賴呀？做錯事唔去反省不單止，仲走去賴執法者？何俊仁，乜而家係政府逼「青年新政」宣誓時辱華架咩？唔好玩啦！

「初犯」、「重犯」、「積犯」

第三，對唔住呀，何俊仁，以往雖然好多人喺宣誓時玩嘢，不過用「支那」辱華，肯定係第一次。以往班立法會議員就算點玩嘢都好，都唔會去侮辱國家，況且以往忍你，唔代表你啱，只係畀次機會你！問題係你班反對派係愈玩愈過份，去到忍無可忍地步嘛！一次就「初犯」、第二次已經係「重犯」，去到第三次就係「積犯」啦，何俊仁你係律師，冇理由唔明架！

正因為愈來愈人為犯事者護短，香港今日先會咁多風波。何俊仁身為政壇老手，冇理由唔知咩係「是」同「非」，今次只不過有人為咗達到政治目的而顛倒黑白啫，香港市民好習慣架啦。順帶一提，「青年新政」兩件人形物體係透過何俊仁間律師行去請資深大律師打官司架，何俊仁咁多利益衝突，好心就收聲啦！

圖片來源：大公報