囍雨尋晚機緣巧合之下，喺朋友FB睇到一段演講，主講者係專業聯盟主席劉炳章。演講令本人印象深刻嘅，應該係劉炳章不點名批評立法會議員姚松炎「政治凌駕專業」，當選之後不斷發表一啲危言聳聽嘅言論，包括2047年係香港土地大限之類；劉炳章質疑，當專業畀政治凌駕，專業人士發表偏離事實嘅言論，結果只會令專業界別認受性不斷降低。呢單新聞，今朝都冇乜傳媒詳細講，但囍雨反而覺得好值得大家去細味。

乜嘢係專業人士？

囍雨自細少讀書，自然冇機會做到專業人士。不過咁，囍雨以平民眼光去睇，「專業」之所以係「專業」，正因為專業人士喺相關範疇所嘅知識，比一般市民大眾都要多同豐富。喺香港，稱得上專業人士，幾大部份都一定設有「註冊」制度；是所以要「註冊」，就係要合資格，即係有相關學識及資歷嘅人先可以做。

點解專業人士意見重要？

大家時常睇到傳媒就住唔同範疇議題訪問專業人士，好似醫生、工程師、律師、會計師咁，目的其實就係想透過專業人士把口，將一般大眾唔識嘅知識講出來。正因為專業人士喺社會起到「教育」、「解惑」，甚至「主導」輿論作用，所以佢哋公開發表意見時更要不偏不倚，一切以「事實」、「證據」同「科學」為依歸，否則令市民誤會，肯定會對社會做成不良影響。

姚松炎有專業資格又如何？

講返姚松炎，佢作為立法會建築、測量、都市規劃及園境界議員，當選之後就公開質疑，「2047年香港有一半的地契到期，邊個話一定會自動續租？」、「地租有機會可以是1000%？變相補足地價」，又話假如到十年後問題仍未有定案，界限街以北的物業或者會冇人敢買。

發展局局長陳茂波見有議員不斷散播啲不實言論，自然要立刻澄清啦，佢早排就喺網誌話：「1997年7月15日，行政會議就特區政府批出的土地契約及相關事宜，通過一系列的安排，特區政府同日亦公布了有關的政策聲明。根據聲明，沒有續期權利的契約（不包括短期租約和特殊用途契約），在期滿時可由香港特別行政區政府全權酌情決定續期50年而無須補繳地價，惟須每年繳納租金，款額相當於有關土地應課差餉租值的3%；租金其後亦會隨應課差餉租值的改變而調整。」

專業人士就應該識

「喂，呢啲嘢，一般市民點知喎，政府梗係有責任澄清啦！」啱，因為市民真係唔會識，但姚松炎作為專業人士同立法會代表，佢就一定要識囉，呢個就係「專業」同「非專業」嘅分別！
寫到呢度，囍雨已經寫得太多，不如等我套用劉炳章嘅演辭去總結：「專業界在香港市民心目中的形象、社會的地位，乃經過百多年業內同仁共同建立。專業界別之所以稱為『專業』，並受到到社會之尊重，全因社會期望業界事事都以『實證、科學、事實、理據及道德』為依歸。任由『政治凌駕專業』或『行業私利』凌駕整體公共利益，行業公信力自會褪色，社會對其之尊重，將消失殆盡。」

圖片來源：CUHK