用「鑊鑊新鮮，鑊鑊甘」去形容今屆立法會真係一啲都冇錯。今日已經係今個會期第四次會議，頭三次發生乜事，相信唔使囍雨講大家都知，以為今日冇咗「青年新政」會靜返少少，SORRY喎，非建制派原來唔係咁諗，咁易畀你開到會，咪好似一切回復到正常咁？不過，唯一囍雨估唔到嘅係，一向「和理非」嘅民主黨今次竟然率先發難啫！
 
許智峯不跟議事規則
 
社會要有規矩，立法會作為權力機關，手握成個香港財政權，政府提交法案，都要立法會審議架。立法會咁大POWER，稍有正常思維都會諗到，開會冇理由唔使規矩。大家諗諗，開會唔使跟程序同議事規則，議員可以唔跟議程隨便講，咁點開到會先？
 
三歲小朋友都明嘅道理，偏偏讀法律嘅民主黨許智峯唔明。今日嘅議程本來就係議員質詢政府官員環節，許智峯抽到去提問，好應該趁機「質問」一下特區政府官員吖，佢哋平時唔係好多不滿咩？哈，點知許智峯竟然唔問，企起身就話要傾「人大釋法」喎！吓？你話傾乜就傾乜，咁要議事規則做乜？
 
內委會已在傾「釋法」
 
「人大釋法」重唔重要？重要架，立法會冇理由唔使傾，不過唔係你想傾就傾！查實立法會內務委員會今朝喺立法會大會前，已經傾咗「釋法」一段時間；內務委員會係所有立法會議員都可出席嘅，你覺得傾唔夠？可以再要求開會傾，因乜要成個立法會大會遷就你？乜成個香港只係得「釋法」要傾咩？冇其他嘢值得討論嗱？
 
睇返許智峯條質詢，內容係關於立法會選舉投票日，有人投訴無故失去「超級區議會」嘅選票。嗱，呢單消息就唔知真定假喇，但當日傳到好勁囉，相信唔少市民都記得！呢單嘢涉及選民投票權咁大件事，許智峯因乜突然覺得一啲都唔重要呀？做乜有機會畀你問政府，你又選擇放棄去玩嘢先？解唔通囉！
 
已經畀咗好多次機會
 
仲有呀，許智峯唔跟議程發言，立法會主席梁君彥當然要出聲「叫停」，要求許智峯坐低，點知許智峯死都唔肯，堅持繼續吵吵鬧鬧。囍雨睇住直播架，梁君彥叫咗佢好多次都唔聽，逼不得已先要求佢離開會議廳。點知，班非建制議員都係繼續玩嘢，阻止保安帶許智峯離場，最終又搞到休會，好彩下午成功復會咋！
 
講真，非建制派查實係唔係唔想開會？係的話，不如大大方方講畀香港市民知：「我哋非建制派係玩嘢架喇，未來四年都會繼續玩，唔會做實事。」若然你哋肯坦白，市民仲會有幾分尊重畀你哋囉，而家成日搵藉口搞事，又要玩激進、又要道德光環，呢個世界邊有咁著數？
 
好啦，唔好話囍雨剩係識得鬧，非建制派今次仲有乜解釋？梁君彥畀咁多次機會、內務委員會又可以繼續傾「釋法」，你班人為乜阻住開會先？

圖片來源：無綫新聞截圖