噚晚，香港又發生暴力抗爭事件。今次衝擊、堵路、襲擊警察嘅暴行，同年初一旺角暴動一樣，都係由一班港獨派一手策動；今次大家見到啲人帶住港英旗、「香港不是中國」（HONG KONG IS NOT CHINA）標語去衝擊中聯辦，擺明就係要起革命，用衝擊話畀人聽佢哋點都要搞港獨。難為一班畀人推上「戰場」嘅後生仔，自己一邊喺度衝，班主事者就一邊縮，擺明搵佢哋就爛頭卒。

「野貓式」行動 主事者敢講唔敢衝

噚晚當非建制舉行嘅遊行完成，班港獨派要無申請許可下遊行去中聯辦嘅時候，相信大家已經估計到，佢哋噚晚一定有所「行動」，結果一如大家所料，班友仔衝擊中聯辦不成，就轉移目標喺干諾道中同德輔道西玩佔領，掟玻璃、掟磚，又用竹枝襲擊警方，睇嚟佢哋係搞緊革命，仲要係「香港建國、脫離中央」果隻。

噚晚參與衝擊嘅人數唔算好多，但睇新聞片段，絕大部分參與衝擊嘅都係年青人，而且現場嘅物資、口罩、水、遮、竹枝以至其他武器，好有系統咁喺現場分發，事件明顯就係一場有準備、有組織嘅「革命」，而唔係咩烏合之眾、散兵游勇。如果多啲人參與衝擊，成個西環畀佢哋燒晒都仲得，大家唔好以為係小事。

自己龜縮 推其他青年「送死」

搞港獨係咪問題？係問題；違法抗爭係咪問題？都係問題；犯完法唔找數係咪問題？一樣係問題。不過，囍雨見到另一個都好大嘅問題，就係港獨派嘅一班頭頭，眼見都係叫人去衝去打，自己就縮喺後面，完全係「又要威，又要戴頭盔」，好似黃台仰咁，叫人去衝自己就坐喺度，羅冠聰就好似常識問答比賽咁問番啲示威者去邊、好似佢無份咁；至於事件主角梁頌恆同游蕙禎，喺度叫人「野貓式」抗爭，梁頌恆兩點幾先叫支持者走，啲人都未散晒，就畀傳媒影到自己搭的士走人，呢啲領袖真係唔知去邊度搵好喇！

發生呢啲咁荒謬，但永遠有後生仔和應嘅衝擊事件，真係令囍雨諗起新界西立法會議員、熱血公民鄭松泰嘅一番說話，佢同黃洋達其實成日都畀人鬧佢哋叫人衝擊畀人拉，自己就置身事外，鄭松泰喺回應有關指控嘅時候，就話自己抗爭係以「不受傷、不被捕」為前提。

老實講，你唔想畀人拉，其他年青人就想畀人拉咩？今日班港獨派領袖煽動啲年青人去衝擊唔單止可能毁咗啲青年一生；佢哋咁搞落去，議會內、外一片混亂，遲早所有香港人都要同佢哋找數。

原圖：選舉事務處、網絡圖片