梁頌恆、游蕙禎宣誓時辱華、宣獨風波越演越烈，除咗政府提出司法覆核質疑二人議員資格，最近又有消息傳出人大常委會將就事件釋法。各方群情洶湧，本來都係預計之事，但囍雨今日睇到《環球時報》一篇題為「將梁遊逐出立法會已是13億人意志」嘅社評，完全feel到內地媒體畀香港人更嬲，因為梁、游一言一行，已經完全超越道德、政治底線。
 
公然辱華、宣獨 豈能成為議員
 
《環球時報》嘅社評指出，梁、游二人公開打出「香港不是中國」標語、惡意修改誓詞，已經完全喪失議員資格，而且二人以「支那」稱呼中國，做出全世界議會反對派都唔敢做嘅事，如果仲畀佢哋宣誓成為議員，包括香港在內嘅全國人民以及海外華人都唔會答應。
 
囍雨認為，內地媒體咁憤慨地看待二人問題，除咗反映內地可能有官員對二人辱華、宣獨嬲到極點外，媒體作為反映民情民意嘅載體，篇社評多多少少都反映內地市民對事件非常反感。
 
囍雨咁講係有根有據架，話說囍雨喺內地都有一啲年青朋友，佢哋最近喺WeChat不時追問香港係咪有好多人叫緊佢哋做「支那人」。雖然已經不斷解釋，話咁講嘅只係香港極少數，而且好多香港人都譴責佢哋嘅惡行，但朋友們聽完都係半信半疑，部份始終覺得，好多香港人完全唔將內地人放喺眼內，甚至唔當佢哋係「人」，否則都唔會用咁侮辱嘅字句話佢哋。
 
畀自己人侮辱 更怒更痛
 
唔少香港人都對《環球時報》嘅社評冇乜好感，部份香港傳媒仲喜歡特登抽出《環球時報》嘅社評大報特報，炒作兩地矛盾情緒。老實講，囍雨亦唔係全部BUY晒呢啲觀點，但作為理智嘅香港人，有時都要反思一下，點解中央政府同內地媒體，今次對「青年新政」兩個人形物體嘅所作所為咁大反應呢？
 
部份仍然包庇梁、游二人嘅人可能會話，佢兩個都係玩下花招，用侮辱字句宣誓好小事啫，WELL，或者佢哋真係咁諗啦，但係這邊廂，梁、游堅持拒絕為佢地呢啲言行道歉，仲同媒體講佢地唔係玩，係好認真咁宣誓效忠「香港國」；另一邊廂，香港市民、內地市民以至海外華人都認為事態嚴重，中國人竟然用最毒辣嘅詞彙侮辱番中國人，仲要喺莊嚴嘅議會宣揚港獨，怒火真係難以平息；嗰種感覺就好似我哋畀外人出賣都算啦，但原來出賣自己嘅係最親嘅家人、朋友、同胞，果種錐心之痛，實非一時三刻可以沖淡。
 
再者，現實啲講番佢哋做議員單嘢，如果梁、游宣誓就任，以後用盡政府資源宣獨，議會內二人聯同「暴力狂」黃台仰等「助理」興波作浪，反轉議會宣「獨」，議會外又利用議員津貼喺地區開辦事處播「獨」，大家認為呢啲危害社會嘅情況可以接受嗎？所以無論司法覆核或者人大釋法也好，梁頌恆同游蕙禎，「革扯」！