解放軍駐港部隊今日喺青山綜合訓練場舉行聯合演習，模擬打擊武裝份子。事後有分析指，今次演習係用嚟震懾非常囂張嘅「港獨」勢力。呢項分析準唔準冇人會知，唯一肯定係，駐港解放軍自回歸以來，為咗唔想影響香港市民日常生活，一直都係採用「禁閉式」管理，以往面對香港公眾，主要都係做文娛康體活動，點解今日大家會「覺得」呢股「港獨」勢力有機會逼到駐港解放軍行到「演習」呢一步呢？會唔會係因為，「港獨」份子嘅行為已經去到令大部份香港人都忍無可忍嘅地步呢？
 
解放軍非首次演習
 
今次演習，駐港解放軍模擬有一批武裝份子佔據青山地區構建營地，計劃向港九地區滲透襲擊。解放軍駐港部隊海陸空部隊組成聯合戰鬥群，打擊武裝份子及清剿營地，先在空中偵察，發射干擾彈，武裝直升機發射火箭等等。
 
演習內容唔多講，有興趣自己睇電視新聞，囍雨覺得最值得討論嘅係，唔理今次演習係唔係針對「港獨」都好，點解今時今日大家會認為有此可能先？今次都唔係駐港解放軍第一次軍演，以往又唔見大家聯想到同分離主義有關？
 
講到尾，都係同分離主義、「港獨」勢力近年愈來愈過份有關。大家其實心知肚明，中央政府底線係乜嘢，咁多年以來，就算係講「反共」、講爭取西方式選舉制度、甚至有人搞「變相公投」，中央幾時試過咁緊張？但近年呢？由舉龍獅旗遊行、到粗言穢語嘅所謂「驅蝗」行動、再到所謂「光復」嘅種種暴力趕內地旅客示威、及至今年年初旺角暴動，班分離主義者唔單止無收斂，仲愈來愈過份。
 
分離主義愈來愈過份
 
暴力唔單止，部份激進香港選民仲選埋啲喪心病狂、瘋狂侮辱二千萬抗日戰爭死難中國人嘅人形物體做立法會議員，呢兩位連「人」都唔知算唔算得上嘅議員，竟然喺立法會宣誓期間用「支那」去侮辱國家，去到呢個地步，囍雨家中嘅老人家嬲到出唔到聲，相信唔少正常香港人都同中央政府都一樣，好難忍呢啲「播毒」派！
 
查返資料，駐港解放軍舊年亦曾針對可能出現的恐怖主義活動進行演習，設定屯門青山有一群恐怖分子藏匿山坡，出動武裝直升機機槍掃射同精確導彈攻擊目標，跟手仲派兩棲裝甲車遠程掃射山上目標，並且喺裝甲車放出煙霧彈後，安排百幾個步兵手持自動步槍，在煙霧彈掩護下總攻擊；由此可見，類似演習已經唔係首次。
 
解放軍不會隨便出動
 
講真，筆者亦唔信中央政府會輕易出動解放軍去處理「港獨」。但正如文首所講，點解大家有呢個疑慮先？喂，之前都講過啦，自回歸以來，駐港解放軍一直都係禁閉式管理，軍紀嚴明，秋毫無犯。呢個安排，其實就係過渡期嘅時候，中央政府咗尊重港人意願，以及維持「兩制」穩定，所以接納咗當時出任基本法諮詢委員會秘書長嘅梁振英，以及一批香港委員將駐軍封閉式管理嘅建議。
 
今日駐港解放軍雖然常駐香港，但平日絕對唔可以離開軍營，更遑論喺市區隨意活動。相對殖民地時期，英國軍人喺香港嘅自由度同一般市民無異，呢種自由當時亦未經過本地民意授權。
 
睇到上述兩者分別後，大家都應該相信，駐港解放軍絕對不會隨便出動，2014年歷時79日嘅違法佔領，「冇」；今年年初旺角暴動，「冇」，我哋當然亦唔希望有需要佢哋出動嘅機會。
 
唔想駐港解放軍被迫出動，「港獨」份子固然有知所進退，香港選民亦真係要認真諗一諗，點解大家堅持用《基本法》賦予嘅選票搞亂香港？就算硬係要投畀反對派，乜真係冇更好選擇？呢個問題，囍雨唔講太多，留返畀大家慢慢思考啦。

圖片來源：無綫新聞截圖