囍雨成日覺得，大部份情況下，做錯事、講錯嘢都可以原諒，只要真心悔改，大家都應該畀個機會改過自新。不過，對於死不悔改、執迷不悟嘅人，囍雨認為除咗譴責，適當嘅懲罰亦屬必須。講緊邊個？咪就係發表侮辱中國同全球華人言論嘅梁頌恆囉！呢個人形物體發表「支那」論都已經半個月，唔道歉不特止，前日見記者果時仲話自己「無怨無悔」、「問心無愧」喎，嘩，到底佢真係唔係「人」，定係囍雨對「人」嘅定義同佢差太遠呢？

嗱，如果梁頌恆講「無怨無悔」、「問心無愧」係指自己發表「支那」言論「問心無愧」，囍雨就真係想問下，佢捫心自問，就算佢唔當自己中國人，但用「支那」呢個詞去侮辱中國同二千萬二次大戰死難中國人，咁樣真係少少錯都冇？定因為佢同班支持者都係「反中派」，反到連自己都唔再係「人」，所以「問心無愧」呢？

必須強調，就算佢唔當自己中國人，但如果佢講完啲侮辱他人、無視別人血淚史同戰爭慘狀嘅言論，仲真心覺得「問心無愧」的話，講真，真係幾恐怖，因為咁代表咗，喺佢心目中，所有被軍國主義者蹂躪同殺害嘅人，原來真係「支那」二字所包含嘅意思：「你班人低等，所以我可以殺；你班人係豬，所以我可以劏；你班人係奴隸，所以我可以姦！」除咗冇人性、冇血性嚟形容之外，都唔知仲可以講乜。

如果真係咁嘅話，梁頌恆莫講話做中華人民共和國香港特別行政區嘅立法會議員，佢連做「人」都冇資格。

唔止咁架，梁頌恆前日仲攞童話「國王的新衣」嚟做比喻，類似意思話自己做咗入面講真話嘅小朋友咁話；言下之意，所有侮辱言論都係真心話嗎？梁頌恆，如果你言行一致，唔該你唔好再做要效忠《基本法》嘅香港立法會議員喇，做一個喺街頭嘅「抗爭流氓」算囉！

原圖：std.stheadline