嘩嘩嘩！我冇聽錯吖嘛，泯滅人性兼辱華嘅「青年新政」游蕙禎今日回應建制派議員離場抗議佢有得宣誓時話：「議員責任係開會！」至於民主黨涂謹申就仲偽善，佢話：「建制派粗暴利用議會程序，阻礙議員行使憲制權利！」係呀，大家冇聽錯呀，呢兩個支持「拉布」同「流會」嘅小人，竟然夠膽用返以往建制派批評佢哋嘅說話去鬧人囉，真係有冇咁無恥呀？

嗱，囍雨就好公道嘅，今次建制派離場抗議，搞到「流會」的確係不爭嘅事實。佢哋咁做啱唔啱，市民大可自行判斷，但至少建制派講得出道理來，咪就係要「抗議兩個侮辱全球華人嘅候任議員有得宣誓」之嘛。

講開「政治宣示」，始祖肯定係非建制派莫屬啦，佢哋「拉布」嘅時候，乜嘢意識形態都可以搬晒出嚟，為拉倒政府法案無所不用其極，好似「創新及科技局、版權修訂條例、醫委會改革」等等，上述各個利民法案，交上立法會時都已經有晒社會共識，最終咪又係畀非建制派一次又一次「拉死」！

唔好唔記得呀，仲有「長者生活津貼」同埋「低收入在職家庭津貼」兩項利民措施，全部都被「拉布」拖慢咗幾個月。佢哋一時點人數、一時不斷發言講廢話；點人數嘅時候，大部份非建制派都走晒出去行行企企，「拉布」嗰班仲好意思話只要建制派坐晒喺度就唔使流會，講到好似開會同非建制派無關咁。

仲有呀，當講到要修改議事規則去「反拉布」時，班非建制派又群起反對，話會削弱監察政府嘅能力喎。你班人係唔係傻架，咁咪即係「粗暴利用議會程序」囉，涂謹申今日咁鬧人，佢到底知唔知「醜」字點寫？

好喇好喇，今次游小姐終於講返句公道話，知道立法會議員責任係「開會」，希望佢將來「唔好今日嘅佢，打倒明日嘅佢」啦。嗱嗱嗱，囍雨CAP晒圖、剪晒片架喇，游小姐唔好「講得出，做唔到」呀！

原圖：RTHK、std.stheadline