立法會第一日開會就陷入一片混亂，可謂係意料中事，因為一班本土派、港獨派未入議會已經講到明自己會抗爭，囍雨甚至聽過有人話自己「有原則、無底線」，所以如果班友仔入到議會唔玩嘢大家先驚。不過玩還玩，如果攞中國人嚟玩，話中國係支那等等，就真係令人難以接受。更難接受嘅，係一班以溫和、理性泛民見稱嘅議員，都同呢班激進派癲埋一份，好似自己已經成為激進議員咁。

大家試想一下，以前有事冇事會衝出主席台嘅議員，嚟嚟去去都係黃毓民、梁國雄、陳偉業同埋陳志全等，但噚日香港眾志羅冠聰宣完誓就質疑立法會秘書長陳維安，之後好多非建制派議員都衝晒出嚟，當中包括公民黨楊岳橋、民主黨鄺俊宇同尹兆堅等。大佬呀，如果議員宣誓唔符合方式、形式，或者改變誓言嘅實質內容，立法會秘書唔係有權裁定佢哋宣誓無效，而係立法會秘書根本無權力喺呢個情況之下為佢哋監誓，係咪無權監誓都唔得先？

溫和泛民被牽着鼻子走 進退失據

一班非建制新丁要搏「表現」都算啦，民主黨老大哥、現屆立法會最資深議員涂謹申自己作為律師，第二日上電台講啲嘢又係離晒譜，類似話以幽默、輕鬆嘅方式宣誓都可以符合法律，囍雨真係好想問，粗口、支那呢啲唔係幽默、輕鬆咁簡單呀？再者，話誓詞前後「加料」與誓詞無關呢個說法，囍雨真係完全唔認同，舉個例，如果有人宣誓完講句「守護香港國」（Nation一字可解為民族，但亦可解作國家），咁唔通仲要話佢之前宣誓有效咩？如果連民主黨老大哥都玩「盲反建制派、盲撐激進派」，咁議會點會唔畀少數議員騎劫呢？

囍雨最想講嘅，係溫和泛民尤其係民主黨，點解喺泛民主派碎片化嘅情況下，都穩佔每區一席，仲要超區搶到兩席呢？係因為社會上有相當部分嘅溫和泛民支持者投票畀佢哋，否則佢哋今屆又點會攞番好成績？今日，民主黨等溫和泛民選擇跟住班激進派、本土派走，唔緊要！但他日溫和泛民支持者唔buy佢哋，激進派支持者又覺得佢哋outdate，佢哋仲有咩選民基礎支持呢？更何況，唔好忘記選民將期望託付畀佢哋，唔係要佢哋玩串立法會，而係監察政府、理性論政。

原圖：stheadline