嘩！好大件事呀，黃之鋒被泰國拒絕入境喎，咁「大件事」囍雨又點可以唔講呀？黃之鋒話，呢件事係中央政府施壓嘅結果，就連泰國總理巴育亦話，呢件係「中國嘅事」，就咁睇落黃之鋒冇錯吖。嗱嗱嗱，囍雨冇話黃之鋒錯，只係想大家睇多幾面，要清楚明白件事唔係咁簡單。

睇清楚泰外交部聲明

首先睇睇泰國外交部份聲明先，聲明清楚指出，泰國政府拒絕黃之鋒入境，係因為黃之鋒本人積極參與反政府抗爭，為免激化泰國政治衝突及維護政局穩定，依法拒絕其入境。聲明更表明，事件中完全無外來指示或要求。

明嘅、明嘅，冇理由話巴育講大話嘛，但大家又知唔知巴育除咗話係「中國嘅事」之外，仲講過乜呢？據報道，巴育承認，黃之鋒入境時間「唔合時」，因為入境當日係「1976年法政大學層殺事件」四十週年，擔心黃之鋒若果喺集會期間批評泰國政府，會煽動當地人民咁話。

即係咁，事件中有冇「中國因素」呢，囍雨就唔敢講，話完全冇，好多讀者都唔信；之但係，若然話泰國政府有多重考慮，唔會只係考慮「中國因素」，咁就肯肯定就唔係亂吹，而係客觀判斷囉。

軍政府上場 泰政局不穩

唔知大家記唔記得，今時今日泰國總理巴育係點上場嘅呢？一般分析相信，原本係陸軍總司令嘅佢，係喺得到皇室默許下發動政變，推翻民選經理英祿。泰國政事，囍雨唔識批評，唯一肯定係，巴育政權嘅行動，泰國內部一定有唔少反對聲音。

再者，泰國近年內部都唔見得有幾平靜，早幾年紅衫軍、黃衫軍佔領曼谷街道，泰國政局早就唔可以話「穩定」。近年呢？恐怖襲擊頻頻，大家記唔記得呀，舊年就一位香港歌手容祖兒嘅歌迷Vivian，喺泰國畀班「疆獨份子」炸死，死時得19歲咋陰公！

泰國恐襲頻頻 點會畀黃之鋒亂來

今年呢？短短兩個月前，泰國著名旅遊勝地華欣，喺一日之內遭到4枚炸彈襲擊，而普吉島亦發生多次爆炸！嘩！泰國局勢咁亂，講真，如果囍雨係當權者，都冇乜可能畀黃之鋒呢類外人入境泰國囉。將心比己，任何政府都會咁做，真係一啲都唔出奇。

點都好啦，黃之鋒唔可以入境泰國已成事實，佢認為香港政府應該跟進佢「無故」畀人拘留12小時呢樣嘢，囍雨覺得都無可厚非，但有時諗深一層，黃之鋒到底有冇諗過自己點解咁不受歡迎？點解連續有兩個東盟國家（包括馬來西亞）唔容許佢入境呢？真係咁簡單得「中國因素」四個字？

諉過於人好Easy，但真正有質素嘅政治人物，最重要仍然係反躬自省，唔知黃之鋒又做唔做得到呢？