《蘋果日報》早兩日又再「炒作」，話有沙田區議員透露，房署上星期派人同地區人大「摸底」，計劃收返香港球會傑志個「沙田石門訓練中心地皮」去起居屋，話咁做係「犧牲體育發展」喎。即係咁，囍雨冇打算討論起公營房屋畀香港人住，係唔係比「發展體育」更重要，畢竟呢個係觀點角度問題，一言難盡。反而從呢篇新聞可以睇到，政府中人落地區「摸底」，其實真係完全冇問題，而且仲有利政府凝聚民意添。

唔「摸底」點知社會有反彈？

各位體育迷群起攻擊上述計劃前，請先認清楚一點：而家只係「摸底」階段，就當真係落實，都仲有幾年時間，想發表意見，而家就好同代表到自己嘅議員傾傾喇。

講真，如果唔係因為「摸底」，房屋署呢一刻點會知道社會有反彈？如果房署唔事先做「摸底」工夫，整好份研究報告後夾硬上馬，社會反彈豈不是更大？而家呢件事「曝光」，房署一定可以吸納到好多意見，就算他朝落實方案，政府如果可以提出重置訓練場地嘅安排，甚至喺區內增加其他訓練同體育設施，我想問一句，係唔係真係傾都冇得傾先？

今次嘅沙田「摸底」，更加凸顯到房署起公營房屋時嘅操作係一以貫之：今次搵沙田區議員呢班法定諮詢架構嘅代表傾，上一次橫洲事件呢？其實房署都係搵法定諮詢架構嘅代表喎，好似時任元朗區議會主席、屏山鄉委會主席同副主席等等。由此可見，房署係根據「公職身份」去約人「摸底」，唔通真係是旦搵個街坊去傾咩！

冇利益輸送 「摸底」自然冇問題

講到天腳底，「摸底」根本係施政裡面重要嘅一環，只要當中唔包含「利益輸送」，呢種非正式諮詢可以話「絕無問題」。事先唔摸，唔通事後先補救？太遲喇啩？

今次沙田石門係咁，其實之前上次橫洲公屋項目都係一樣，大家唔好靠估靠吹，到底有冇「利益輸送」喺邊先？有嘅，咪拎證據出嚟囉，有確切證據，囍雨同你一齊上街反政府又點話。

仲有，啲人成日口口聲聲話「乜乜乜勾結」，如果今次房署因為聽到體育界好大反對聲音而擱置計劃唔起居屋，唔通又可以話「官體政媒」（政府、體育界、政界、媒體）勾結喇喎？唔可以咁囉！

圖片來源：香港賽馬會網頁