呢期除咗朱凱迪，成日出嚟講土地問題嘅姚松炎曝光率都非常之高，表面上睇佢講嘢好似好正路咁，其實內容就矛盾重重，點解囍雨咁講？無嘅，之前講到橫洲棕地嘅業者安置問題，姚松炎仲大大聲話政府可以引用土地收回條例收地，仲舉埋例話政府以前無安置、賠足錢都可以收地；說時遲、那時快，到佢講鴨脷洲用地改劃嘅時候，就鬧趕走駕駛學院、未有安排搬遷喎，囍雨真係唔知佢想點喇。

如果大家有留意建築、測量、規劃及園境界候任立法會議員姚松炎近日嘅言論，佢一直都強調政府要收地其實唔難，佢日前喺城市論壇，就話政府曾經喺1994同2000年，引用官地收回條例收番將軍澳鐵廠土地同新界一幅棕地，當時都無提出搬遷安置同唔駛賠足錢先收地，仲批評其他人「當年大家又唔出聲，話搬人容易？」。

橫洲唔駛安置賠足錢 但鴨脷洲就要做好搬遷工作？

聽完姚松炎咁講，大家都可能以為收地好易、唔駛賠足錢又唔駛安置啦，點知姚松炎噚日講到政府早前建議將鴨脷洲利南道一幅用地改劃嘅時候，除咗話香港對休憩用地有標準之外，仲話趕走該地嘅駕駛學院，未有安排搬遷，係扭曲運輸專業喎。

嘩，橫洲果啲貨櫃業、運輸業同埋重型機械果啲業者姚松炎就講到好易收地咁，但鴨脷洲駕駛學院佢就話未安排搬遷就趕人走，一邊就話收地唔一定要安置，另一邊就鬧趕人走唔做好搬遷工作，姚松炎呢啲根本就係典型嘅雙重標準。姚松炎嘅立場，其實好簡單，只要政府企一邊，佢企另一邊就okay架喇；如果搬遷、運輸專業咁緊要，唔知姚松炎會唔會「覺今日而昨非」，贊成橫洲棕地都做好搬遷工作先呢？

原圖：elections.gov.hk