尋日講到喺立法會選舉拎到49萬票嘅民主黨大話精鄺俊宇，一直聲稱「唔知」政府有計劃喺元朗橫洲起17,000間公屋，仲呼籲運輸及房屋局確認，喺2014年3月17日嘅「摸底」會面中，並冇提及17,000間嘅計劃。運房局相當正人君子，尋日傍晚已經表明冇喺會面提及上述數字，鄺俊宇班FANS聽到即刻勁興奮，自High以為還到偶像「清白」。唉，呢班人到底知唔知乜叫「常理」？為咗撐個大話精，真係連「常理」都唔使顧？

乜嘢叫做「從來唔知」？

如果大家有留意囍雨尋日嘅文章，應該好清楚本人從冇話過房屋署代表有喺「摸底」會面上提到17,000間嘅建屋計劃。證明鄺俊宇知道呢個計劃，係喺2014年1月24日《明報》嘅報道，鄺俊宇自己喺訪問表示，知道房屋署「初步構思興建約1.7萬個公營房屋單位」。

OK，鄺俊宇打倒昨日的我，狡辯話呢個只係記者提供嘅消息，唔係來自政府，但咁又點？咁就代表佢冇聽過呢個計劃？事實係，鄺俊宇起碼喺2014年1月已經聽過上述計劃，佢話自己「從冇聽過」，咁仲唔係「失實」？

有否盡區議員責任？

去到呢度，希望大家嘗試放低政治立場，用一個正常人角度去思考。

鄺俊宇2014年1月聽到消息，短短兩個月後，即係3月就同房屋署代表見面講同一個計劃；試問一句，如果你係鄺俊宇，即係一個有幾年經驗嘅區議員，聽到房屋署代表向你提出嘅數字，同自己兩個月前聽到嘅消息唔同，你會唔會追問？會唔會跟進？

假設鄺俊宇真係不聞不問，咁可能性就有兩個。一）唔記得；二，根本樂見橫洲只係起4,000間公屋。

如果係第一個情況嘅話，鄺俊宇作為區議員就係「失職」、「塞責」；如果係第二個情況，咁呢位拎住49萬票既候任立法會議員，就係虛偽、係抽水、係「政棍」！

鄺俊宇喺區議會會議粒聲都冇！

囍雨尋日已經寫過，根據會議錄音同紀錄，政府2014年6月24日正式向元朗區議會提出，橫洲公屋項目嘅首期計劃，目標係先興建4,000間公屋。鄺俊宇喺會上完全冇表達過「反對」意見。

本人真心好想拎住49萬票嘅民主黨大話精解釋，點解當日粒聲都冇？點解喺政府走過晒法定諮詢程序後，先走出嚟話「官商鄉黑」勾結？當日你有份通過政府提交嘅建議，如果真係有「勾結」嘅話，你係唔係都有參與其中？鄺俊宇作為代議士，可以喺會上直接質詢一眾鄉事派，包括屏山鄉委會主席曾樹和，點解你冇咁做？

其實結論好簡單：有人畀人踢爆就扮無辜、詐唔知。今日香港，拎住49萬嘅所謂立法會議員原來就係咁嘅質素同態度。最衰就係嗰份《蘋果日報》，到咗今日仲為呢個大話精護航，無計啦，老闆大大枝水喉射住民主黨，你哋都冇辦法唔撐啦，Right？講到底，鄺俊宇完全冇可能未聽過橫洲起17,000個單位嘅計劃，包括一眾只係識洗版嘅網民在內嘅盲撐派，你哋到底醒未呀？

圖片來源：星島日報、clipartbest.com