一個拎到49萬票嘅立法會選舉當選人，大家期望佢會用咩態度去問政？最基本條件係唔會事事政治立場先行，審議法案同政府撥款時「擺事實、講道理」，同埋最重要，唔可以「講大話」！相信大家已經知我講緊邊個，民主黨新一屆嘅超級區議員鄺俊宇，喺橫洲公屋發展計劃上面為咗攻擊自己視為政敵嘅特區政府，竟然不惜公開講大話推卸責任，講到底就係要抹黑政府，誤導市民喺橫洲呢單Project上面，真係有「官商鄉黑」勾結！

橫洲個項目細節喺度唔多講，政府尋日召開跨政策局記者會，將項目細節及過程接近巨細無遺披露，期間仲大踢爆，原來兩位民主黨元朗區議員，包括鄺俊宇自己都曾經同政府官員有過無正式接觸，等佢哋有機會就項目表達意見。誰不知鄺俊宇竟然隨即反駁，話政府轉移視線，自己「從來唔知」橫洲項目一共有17,000個單位、唔知道有分期建屋計劃，同埋喺非正式接觸期間，有房屋署官員反映，點解唔收冇民居嘅橫洲土地喎！好啦，就等囍雨逐一篤爆你啦！

從來唔知建17,000單位？

房屋署同鄺俊宇嘅非正式會面係喺2014年3月17日，但據《明報》2014年1月24日嘅報道，鄺俊宇當時已經透露，知道房屋署「初步構思興建約1.7萬個公營房屋單位」，早過非正式會面足足兩個月！咁唔該鄺俊宇講一句，係《明報》屈你吖，定係你大話？

唔知道有分期建屋計劃？

按此推論，鄺俊宇一早就知道房屋署原來打算起17,000間公屋，但去到非正式會面時，房屋署代表同佢交代計劃起4,000間，鄺俊宇作為民意代表，唔通真係一句都唔會問？如果有問，點可能唔知道有分期建屋計劃？

向房屋署質問點解唔收冇民居嘅橫洲土地？

第三，鄺俊宇有冇喺非正式會面同房屋署代表反映「點解唔收冇民居嘅橫洲土地」，囍雨冇辦法知道。囍雨唯一知道，係鄺俊宇喺之後嘅元朗區議會會議，完全冇提出過呢方面嘅「疑慮」！

2014年6月24日，政府正式向元朗區議會提出，橫洲公屋項目嘅首期計劃，目標係先興建4,000間公屋。囍雨查返當日嘅會議紀錄，再聽埋當日會議錄音，鄺俊宇完全冇提出過關於公屋項目選址嘅問題，即係話，當日鄺俊宇完全冇關心、擔心、質疑、懷疑、挑戰過選址嘅問題。區議會係正式法定諮詢架構，鄺俊宇你講到自己關心呢個項目，點解當日唔即場提出？你係唔係講大話？

綜觀上述三點，囍雨好有理由質疑，鄺俊宇唔單止一直知道成個橫洲項目嘅來龍去脈，甚至連項目最新選址，即係佢而家非常反對嘅徵收綠化地，當日其實都冇乜所謂。鄺俊宇，夠喇，市民聽夠你講大話喇，區議會會議紀錄同錄音都顯示，你只係關心交通負荷問題，對選址，你係冇意見嘅！

市民癡心錯付鄺俊宇，諗住佢係一個會講道理同理性問政嘅人，點知到頭來原來只係一個靠講大話攻擊政府撈取政府籌碼嘅「政棍」；你係作家啫，都唔好作故仔作到上晒頭，搞到幻想同現實都分唔清好喎！

拎住49萬票，呢個大話精未來四年肯定繼續橫行無忌。今日香港真係幾諷刺都有。

圖片連結：jmc.hksyu.edu、big5.cri.cn