「♪ 是誰令青山也變 變了俗氣的咀臉 又是誰令碧海也變 變作濁流滔天 ♫ 」喺電影《竊聽風雲3》入面，一眾由唔同明星飾演嘅鄉紳，喺其中一幕合唱呢一首由黃霑填詞、顧嘉輝作曲嘅《風雲》，令呢首老歌早排突然「紅」起上嚟，部分歌詞更加成為鄉紳、「土豪」嘅代名詞。呢首歌本來已經沉寂唔少，點知因為候任立法會議員朱凱迪報稱懷疑因嚴厲批判新界土地問題出現「官商鄉黑」情況而受到死亡恐嚇，結果呢首《風雲》又再死而復生，歌詞被傳媒、網民無限Loop，廣男咁潮，梗係成日掛喺口邊啦。

不過咁，做戲、唱歌係一回事，現實又係一回事，「官商鄉黑」講到咁hit，大家有冇諗過點解突然會咁呢？查實朱凱迪早排選立法會嘅時候，都唔多唔少透露過呢類情況，點解大家當時又好似漠不關心咁、點解有關輿論而家先炒起呢？

老老實實，我本人好相信，絕大部份香港市民都好擔心朱凱迪安危，但以往傳媒冇報道，身邊以至社會都無人Echo佢，議題炒唔起，自然都冇人會突然關心朱凱迪當選前一直都跟進嘅橫洲問題。

喺呢個世界，尤其係政界，永遠唔會有無緣無故嘅事，朱凱迪出嚟話畀人威嚇，泛民、激進派群起而出力撐佢，部分媒體又非常樂意報導事件，無他嘅，選舉呀嘛！咪住先，咩選舉呀，立法會選舉咪啱啱過咗囉，關咩選舉事！無錯，立法會選舉係過咗，但特首選委選舉、特首選舉都嚟緊，喺呢個時候非建制陣營、個別媒體不斷報道、評論相關新聞，除咗民生問題，廣男斷估唔會無政治原因咁pure呀？如果係咁pure，一早企左出嚟撐朱凱迪啦，假仁假義假惺惺！

問題嘅另一個重點，就係「官商鄉黑」嘅問題，平時話官商民合作大家就聽得多，「官商鄉黑」都係近一頭半個月先開始聽到，問題在於係咪有從政者、媒體不停講就等於係呢？我唔知，因為自問完全唔熟悉新界鄉情，但想深一層，其實亦冇乜可能拉得上個「官」字，我就唔信一直關注新界問題嘅社運人士冇報過ICAC囉。「勾結」喎，即係有利益輸送啦？呢度係香港，事件仲要係全香港最敏感嘅土地，要拉上「官」字，真係利益輸送。至於有冇「商鄉黑」勾結呢，大家都係自行判斷啦！

朱凱迪係一個有心人，我唔會隨便批評佢，加上警方近日高調打黑同派人廿四小時保護佢，相信佢被恐嚇一事都相當明確。但所謂「♫想不到海山竟多變幻 再也不見舊時面♩」，今日嘅香港已經唔係幾十年前無ICAC、貪污猖獗、犯罪成風嘅「五億探長雷洛」時代，當非建制派嘅大哥大姐突然關心新界土地問題，大叫「官商鄉黑」勾結果時，我哋真係要諗一諗，唔好畀佢牽住鼻子走，今屆政府落力發展土地，「官」會同「商鄉黑」成功勾結嘅機會，係接近零！

原圖：網絡圖片