有老友話，如果要睇公眾對一個政治人物有乜評價，最簡單嘅方法就係Wiki下佢，睇下維基仔或者其他網民點樣描述呢個人。候任立法會議員、新民黨容海恩作為「全城焦點」，廣男梗係有興趣了解佢多啲啦，於是上網睇下佢啲背景資料，維基百科就咁樣介紹容海恩喇：

「容海恩（英語：Eunice Yung Hoi-yan，1977年6月7日－），是香港一名大律師及建制派的政治人物，是『香港青年專業網絡』主席，2016年1月加入新民黨，在競選資料中其本人提到自己有『法律界桂綸鎂』之稱，但大眾一致認為她比較像TVB甘草演員馬海倫，及後在多次失禮言論後更被網民嘲為"法律界鍾樹根"」

由以上嘅描述可見，網民以至大眾對容小姐印象似乎麻麻，對於一個從政者嚟講，話一個女士似馬海倫事小（其實馬凱倫都唔差），話容小姐係「法律界鍾樹根」，唔多唔少有啲貶意，就算無貶意都係覺得佢似搞笑多。廣男認為呢，其實容小姐同Treegun都有啲相似嘅地方，就係不停畀傳媒、網民「招呼」，但公道啲講，呢樣嘢又唔怪得人，容小姐選舉期間喺論壇嘅表現，又確實係有待改進。

點解咁講？可能因為廣男本身係新界東選民，間唔中都有留意下選舉論壇或者相關新聞，有部分容小姐嘅對答內容，真係令人睇到有啲「驚奇」嘅，例如畀人問贊唔贊成徵收陸路離境稅嚟解決水貨客問題，佢就答「咁飛嗰啲呢？陸路呀？淨係陸路呀？咁飛嗰啲你又唔控制嘞喎？」，又例如問佢阻拉布同議事規則嘅問題，佢又會答「根本就唔使答你，因為你都唔會同意架啦，係咪呀？」真係世界之大，無奇不有。

唔好意思，講咗咁耐，都仲未講到重點，廣男想講嘅重點係，容海恩喺未來幾年都無可避免會畀部分媒體、網民等「重點招待」，情況同2012年當選嘅鍾樹根、蔣麗芸成日被追訪有啲相似，唔同嘅地方在於，容海恩一定會畀人「招呼」得更加厲害，俗啲講佢嚟緊就係「有排受」。

廣男想講嘅重點當中嘅重點，係如果容小姐唔想成日成為傳媒、網民嘅話柄，佢只好畀其他議員更努力去做好自己本份，唔係剩係發下言、投下票咁簡單，而係狠下苦功、將勤補拙（所謂「拙」唔係指佢蠢，係指佢唔「熟書」），用行動、論述去話畀市民、選民聽，佢係得嘅；就算唔能夠Win Back Hong Kong，至少都做一個稱職嘅代議士。廣男呢番說話，真係苦口婆心架！

原圖：takungpao