「橫洲公屋項目」近日因為候任新界西立法會議員朱凱迪報稱被恐嚇一事而成為各界焦點，有人就質疑事件涉及新界土地發展係「官商鄉黑」勾結，又有質疑指橫洲計劃因為鄉紳、地區人士反對，所以興建公屋計劃「大縮水」，建屋量由17,000個變到得番4,000個。特首梁振英噚日已經澄清，總數17,000個單位嘅目標仍然冇改變，點知說時遲、那時快，下晝就有網媒話政府截至去年2月嘅計劃，都重申橫洲只係興建4,000個單位，大約就係質疑特首說法「亂吹」之類啦。

政府迅速澄清

不過好彩，喺嗰個偽網媒發布相關報道之後無耐，政府就發聲明回應，原來喺今年三月，記住係今年三月呀，政府已經向立法會提交嘅文件，重申橫洲發展喺現階段（即半年前）預計提供約4,000個公屋單位，但就白紙黑字列出，橫洲用地其餘範圍「按可行性研究結果計劃作公屋發展及工業邨擴展」以及「按優次逐步推展元朗橫洲用地餘下發展」。即係話，就算興建咗4,000個公屋單位，政府、相關部門都係繼續發展相關土地作興建公屋等用途。

嗱，問題又嚟喇，點解個網媒咁短時間可以搵到咁多文件，包括立法會、區議會以及媒體報道，偏偏漏咗最新同最重要一份呢？個故事創作寫明，政府「至去年2月仍只考慮在橫洲興建4000個公屋」，但呢個擺明唔係事實，政府今年3月係講到明會「繼續研究、發展其餘橫洲用地」嘛，咁重要都可以漏，仲要只係漏呢份？囍雨覺得事件相當有可疑、呢個網媒相當有嫌疑囉！

公道啲講，我哋唔能夠因為媒體「講啲唔講啲」，就一口咬定佢別有用心、另有目的嘅，始終議會文件多如恆河沙數，不過作為心清眼亮嘅市民，囍雨真係好懷疑囉。可能有人會話，一時睇漏「好出奇呀？」；係嘅，係唔出奇......普通人就唔出奇，但媒體就唔係咁講喇。正正因為家陣社會撕裂，新聞工作者（除非係故事創作者啦！）當然要加倍小心，呢個要求唔過份吖。