候任立法會議員朱凱迪收到「死亡威嚇」，引起全城關注事件，當中朱凱迪關於「橫洲公屋」嘅問題，尤其令人關心。囍雨本來聽到話原本預計興建17,000個公屋單位的橫洲計劃，因為有鄉紳勢力反對而銳減至4,000個單位，都覺得好離奇，仲喺度諗如果係真嘅話，情況絕對不能接受。今日特首梁振英終於「解開謎團」，原來計劃只係先取易、再取難，先興建4,000個單位，做好搬遷等工作，再完成其餘13,000個單位。

話說橫洲呢個地方，除咗有棕地之外，仲有已經被壞嘅綠地，而所謂棕地，好多都已經被使用緊，有特定嘅社會功能，例如倉儲用途，要發展呢啲棕地，既要做好搬遷工作，又要處理好環境保護問題，為咗快啲令到有更多基層可以上樓，政府就先發展已經破壞嘅綠地，仲講到明絕對唔會放棄其餘13,000個單位。發展新界土地，新界東北發展區就係其中一個例子，囍雨認為如果要長遠增加土地供應，發展新區可謂無可避免。

事實上，凡涉及收地發展，總會有利益團體走出嚟反對，用開塊地嚟做生意嘅唔想搬，住開當地嘅又想不遷不拆，但囍雨認為，發展土地、解決住屋問題當中總會遇到陣痛，持份者尤其係政府必須要平衡好各方訴求，尋求比較好既解決方案。如果政府喺七、八十年代冇發展沙田、大埔以及屯門等新市鎮，今日面對嘅房屋難題真係大到想像唔到。

特首梁振英今日講到明唔會同黑勢力、惡勢力合作同妥協，囍雨希望政府繼續keep住呢份堅持，未來土地發展嘅重點一定喺新界，就算面對重重險阻，只要係為咗香港長遠利益、開拓土地，香港市民實會一齊向惡勢力Say No！

原圖：cedd.gov.hk